გატარებული რეფორმების მიუხედავად, საქართველოს საბიუჯეტო პროცესი შემდგომ განვითარებასა და სრულყოფას კვლავაც საჭიროებს. როგორც საქართველოს მთავრობის 2011-2014 წლების ქვეყნისQძირითადი მონაცემებისა და მიმართულებების დოკუმენტის საბოლოო ვარიანტშია აღნიშნულია, საბიუჯეტო პროცესის ჩამოყალიბება საერთაშორისო სტანდარტების შესაბამისად უნდა მოხდეს.
ფინანსთა სამინისტროს ინფორმაციით, საშუალოვადიან პერიოდში პრიორიტეტის ფარგლებში დაგეგმილია შემდეგი ძირითადი ღონისძიებები: პროგრამული და კაპიტალური ბიუჯეტის შედგენის მეთოდოლოგიის შემუშავება; მხარჯავი დაწესებულებებისა და ტერიტორიული ერთეულების წარმომადგენლებთან სამუშაო შეხვედრების ორგანიზება პროგრამული ბიუჯეტის შედგენისა და შესრულების კრიტერიუმების შემუშავების მიზნით; საერთაშორისო სტანდარტებთან შესაბამისი, ყოველწლიური, კონსოლიდირებული, ფინანსური ანგარიშგების სისტემის შემუშავება; შესაბამისი პროგრამული უზრუნველყოფის სისტემის შექმნა და დანერგვა, რომელიც გაერთიანებს საბიუჯეტო პროცესის ყველა მონაწილე მხარეს პროცესის ყველა ეტაპზე; მაკრო და ფისკალური პროგნოზირების მოდელის გაუმჯობესება; არსებული ფინანსური რესურსების სტრატეგიული მართვა; სახელმწიფოს შიდა და გარე ვალის (ვალის მდგრადობაზე კონცენტრირებით) მართვის და მონიტორინგის მექანიზმების გაუმჯობესება; საჯარო სამართლის იურიდიული პირების მონაცემთა ბაზის მუდმივი განახლება და გაფართოვება; IPSAS-ის აღრიცხვის სტანდარტის თანმიმდევრული დანერგვის პროცესის გაგრძელება, რაც გულისხმობს მოდიფიცირებულ საკასო მეთოდის დანერგვას და დარიცხვის მეთოდზე დაფუძნებული სისტემის ჩამოყალიბებისათვის შესაბამისი ბაზის მომზადებას; ელექტრონული ხაზინის სისტემის შექმნა და დანერგვა;
აღნიშნული რეფორმის სრულყოფილად განხორციელების შემდეგ კი მთავრობის გათვლებით ქვეყნის საბიუჯეტო პროცესში პროგრამული და კაპიტალური (შედეგებზე ორიენტირებული) ბიუჯეტის დანერგვა და საბიუჯეტო პროცესის გამჭირვალობის ზრდა მოხდბა. იმავდროულად ჩამოყალიბდება საბიუჯეტო პროცესის მარეგულირებელი სრულყოფილი ნორმატიული ბაზა და მაკროეკონომიკური პროგნოზირება გაუმჯობესდება. მთავრობის გათვლებით, 2011 -2014 წლებში საბიუჯეტო დეფიციტი ეტაპობრივად შემცირდება.
ფინანსთა სამინისტროს ინფორმაციით, ბოლო წლების განმავლობაში საქართველოს საბიუჯეტო პროცესში მნიშვნელოვანი რეფორმები განხორციელდა, რის შედეგადაც დაიწყო ბიუჯეტის დანერგვა MTEF-ის პრინციპების მიხედვით, საბიუჯეტო კლასიფიკაცია გადავიდა საერთაშორისო სავალუტო ფონდის GFSM-2001 კლასიფიკაციაზე, შემუშავდა `საქართველოს საბიუჯეტო კოდექსი~, რომელმაც ერთიან სისტემაში მოაქცია და გაამარტივა ქვეყნის საბიუჯეტო პროცესი. რეფორმების შედეგად ასევე გაუმჯობესდა საბიუჯეტო სახსრების აღრიცხვა და ანგარიშგება, დაიწყო მუშაობა სახელმწიფო სექტორში აღრიცხვის საერთაშორისო სტანდარტების (IPSAS) და ინტეგრირებული სახელმწიფო ფინანსური საინფორმაციო სისტემის (PFMS) დანერგვის მიმართულებით.
