თბილისსა და ლუქსემბურგს შორის შესაძლოა პირდაპირი ავიამიმოსვლა დაიწყოს.
ერთიანი საავიაციო სივრცის შექმნის საკითხზე საქართველოსა და ლუქსემბურგის საჰერცოგოს საგარეო საქმეთა მინისტრები ლუქსემბურგში გამართულ შეხვედრაზე შეთანხმდნენ.
როგორც ჟან ასელბორნთან შეხვედრის დასრულების შემდეგ ჟურნალისტებს საქართველოს საგარეო უწყების ხელმძღვანელმა გრიგოლ ვაშაძემ განუცხადა, ერთობლივი საავიაციო სივრცის შექმნაზე დოკუმენტის რატიფიცირება უახლოეს მომავალში მოხდება.
"მივიღე დაპირება, რომ უახლოეს მომავალში რატიფიცირებული იქნება ერთობლივი საავიაციო სივრცის შექმნაზე შეთანხმება", - განმარტა ვაშაძემ.
მისივე თქმით, მხარეებს შორის შეთანხმება შემჭიდროებულ ვადებში გაღრმავებული თავისუფალი ვაჭრობის შესახებ მოლაპარაკებების დაწყების თაობაზეც იქნა მიღწეული.
შეგახსენებთ, რომ გრიგოლ ვაშაძე ლუქსემბურგს ოფიციალური ვიზიტით სტუმრობდა.