აუქციონები ეტაპობრივად ელექტრონულ სისტემაზე გადადის. ამიერიდან ეკონომიკისა და მდგრადი განვითარების სამინისტროს და აღსრულების ეროვნული ბიუროს ელექტრონული აუქციონები www.eauction.ge -ზე განთავსდება და გაიმართება.
ამ მიზნით დღეს აღსრულების ეროვნულ ბიუროს, ეკონომიკისა და მდგრადი განვითარების სამინისტროს პრივატიზების დეპარტამენტსა და ფინანსთა სამინისტროს მომსახურების სააგენტოს შორის ხელი მოეწერა ურთიერთანამშრომლობის მემორანდუმს.
დოკუმენტის თანახმადაც ეკონომიკისა და მდგრადი განვითარების სამინისტროსა და აღსრულების ეროვნული ბიუროს მიერ გამოცხადებული აუქციონები განთავსდება და ელექტრონულ ფორმატში ჩატარდება ვებ-გვერდზე www.eauction.ge
ეკონომიკისა და მდგრადი განვითარების სამინისტროში განმარტავენ, რომ საპრივატიზებო აუქციონები ელექტრონულ სისტემაში თებერვლიდან გადავა.
საპრივატიზებო აუქციონში მონაწილეობის მიღების მსურველებს სახელმწიფო საკუთრებაში არსებული ქონების პრივატიზება საქართველოს მთელ ტერიტორიაზე ელექტრონულად, სახლიდან და ოფისიდან გაუსვლელად შეუძლიათ.
"ელექტრონულ აუქციონებზე საპრივატიზებო ობიექტების განთავსება დაინტერესებულ პირებს საშუალებს მისცემს მონაწილეობა მიიღონ ამ აუქციონებში, რაც პრივატიზების პროცესის გამჭირვალეობას შეუწყობს ხელს. იმავდროულად უცხოეთში მცხოვრები თანამემამულეები ქვეყანაში ჩამოუსვლელად შეძლებენ აუქციონში მონაწილეობის მიღებას",- განაცხადა ეკონომიკისა და მდგრადი განვითარების სამინისტროს პრივატიზების დეპარტამენტის უფროსის მოადგილემ ვაჟა ჩოფიკაშვილმა.
აღსრულების ეროვნული ბიუროს ხელმძღვანელი ნიკა მელია აცხადებს, რომ ბიუროს ელექტრონულ სააუქციონო სისტემაზე გადასვლა პრივატიზების პროცესს კიდევ უფრო გამჭვირვალეს გახდის და რაც მთავარია კორუფციული რისკები მინიმუმადე იქნება დასული.
"აღსრულების ეროვნულ ბიუროში განხორციელებული არაერთი წარმატებული რეფორმის შემდეგ, აუქციონის ელექტრონულ ფორმატზე გადასვლა გახლავთ უნვიშვნელოვანესი ნაბიჯი ორგანიზაციის განვითარების თვალსაზრისით. რაც ნიშნავს ასევე იმასაც, რომ პრივატიზების პროცესი კიდევ უფრო გამჭვირვალე გახდება. კორუფციული რისკების მინიმუმამდე იქნება დაყვანილი და ნებისმერი სერვისი, რომელიც ელექტრონულ აუქციონს უკავშირდება იქნება მოქალაქეზე ორიენტირებული"- აცხადებს ნიკა მელია.
თავად www.eauction.ge -ის განმკარგველი სტრუქტურის ხელმძღვანელი აცხადებს, რომ აუქციონში მონაწილეობის საშუალება არარეზიდენტებსაც აქვთ და მომავალი კვირიდან ელექტრონული გარანტიების სისტემაც ამოქმედდება.
"მნივნელოვანია, რომ პროცესი "ერთი ფანჯრის" პრინციპით განხორციელდება. თუ დღემდე ადამიანს რაიმე ნივთის, ან უძრავი ქონების შესაძენად სხვადასხვა სტრუქტურებსა და უწყებებში უწევდა სიარული, დღეს ეს რთული პროცედურების გავლის სჭირდება აღარ არის. მომხმარებელი სახიდან და ოფისიდან გაუსლელად რეგისტრირდება ჩვენს საიტზე და იღებს მონაწილეობას ელექტრონულ აუქციონებში.
"იმავდროულად მას ყველანაირი ინფორმაცია ამ საიტის მეშვეობით მიეწოდება და რაც მთავარია აუქციონში მონაწილეობა შეუძლიათ არარეზიდენტებსაც. მათ საქართველოში ჩამოსვლა არ სჭირდებათ. მომავალი კვირიდან ამოქმედდება ელექტრონული საბანკო გარანტია და ტრანზაქციების განხორციელება დისტანციურად იქნება შესაძლებელი"_ განაცხადა ფინანსთა სამინისტროს მომსახურების სააგენტოს გენერალურმა დირექტორმა გრიგოლ ბაიბურთმა.
ფინანსთა სამინისტროს მომსახურების სააგენტოში ფიქრობენ, რომ ელექტრონულ სისტემაზე გადასვლა მომხმარებელს აუქციონში მონაწილეობის მიღებას გაუადვილებს. ელექტრონულ აუქციონში გაცილებით მეტი მომხმარებელი შეძლებს ჩართვას, რაც კონკურენტუნარიანი გარემოს შექმნას და აუქციონის გამჭვირვალედ ჩატარებას შეუწყობს ხელს.
შეგახსენებთ, რომ ინტერნეტ აუქციონში მონაწილეობის მისაღებად სავალდებულოა მხოლოდ ელექტრონულ ვებ-გვერდზე www.eauction.ge რეგისტრაცია.