დღეს, 3 თებერვალს საქართველოს ეროვნული მუზეუმის თბილისის ისტორიის მუზეუმში ფოტორეპორტიორის ზეინაბ ბარნოვის კონცეპტუალური გამოფენა "პორტრეტი" გაიმართება.
როგორც "ჯი-ეიჩ-ენს" ეროვნული მუზეუმიდან აცნობეს, გამოფენაზე წარმოდგენილი იქნება რეპორტაჟების დროს გადაღებული ოცამდე ფოტო.
დამთვალიერებელი იხილავს სხვადასხვა დროის ცნობად სახეებს: ილია II, ალექსეი II, ჭაბუა ამირეჯიბს, კოკა იგნატოვს, ოთარ იოსელიანს, მაია პლისეცკაის, ელისო ვირსალაძეს, ედუარდ შევარდნაძეს, რეი ჩარლზს, ტანია მარიას და სხვ.
ზეინაბ ბარნოვი სხვადასხვა დროს წამყვან საინფორმაციო სააგენტოებში
ფოტოკორესპონდენტად მუშაობდა. იგი წლების განმავლობაში ჟურნალ "ანაბეჭდის" ფოტოკორესპონდენტი იყო. ასევე, მოღვაწეობდა მოსკოვში ჟურნალ "VOUGE"-ში. მისი ფოტოები ინახება პირად კოლექციებში საქართველოში, მოსკოვში, პარიზში და ა.შ.
გამოფენა დღეს, 17:00 საათზე გაიხსნება და 16 თებერვლამდე გაგრძელდება.
