ხვალ, 3 თებერვალს, 11:00 საათზე, ჰოლდინგი "საქართველოს ინდუსტრიული ჯგუფი" ასეულობით მილიონი ევროს ღირებულების 2 პროექტის დასაწყებად დასკვნით მოლაპარაკებებს გამართავს. ამ მიზნით "საქართველოს ინდუსტრიული ჯგუფის" ორგანიზებით სასტუმრო "რედისონში" შეხვედრა გაიმართება, რომელშიც დასავლური საინვესტიციო, საკრედიტო და საინჟინრო-საპროექტო კომპანიების მენეჯერები მიიღებენ მონაწილეობას.
შეხვედრაზე წარმოდგენილი იქნებიან ჩეხური საინჟინრო-სამშენებლო კომპანია "ენერგია", ჩეხური "შკოდა ინვესტი", "სოსიეტე ჟენერალეს" ბანკი ჩეხეთში "კომერც ბანკი" და საქართველოში ბანკი "რესპუბლიკა", ჩეხურ-გერმანული საინვესტიციო-საკონსულტაციო კომპანია CZMT და ჩეხეთის სახელმწიფო სადაზღვევო კომპანია EGAP.
გარიგება "საქართველოს ინდუსტრიულ ჯგუფს" ტყიბულში 300-მეგავატიანი, ქვანახშირზე მომუშავე თბოელექტროსადგურის და ქვანახშირის ახალი მაღაროების განვითარების საშუალებას მისცემს. პროექტის ფინანსურ მხარდაჭერას "სოსიეტე ჟენერალის" ჩეხური "კომერც ბანკი" და ქართული ბანკი "რესპუბლიკა" უზრუნველყოფენ, საკრედიტო შეთანხმებას ჩეხური დააზღვევს, ხოლო თბოსადგურის ტექნიკური კონცეფცია მსოფლიოს წამყვანმა საპროექტო კომპანიამ "კოლენკო" შექმნა. ორივე პროექტის შემთხვევაში საინჟინრო, შესყიდვებისა და ძირითად სამშენებლო სამუშაოს საერთაშორისო კომპანიები განახორციელებენ.
სამუშაო პროცესი დასავლურ კომპანიებთან 1 წელია მიმდინარეობს. აღნიშნული პროცესის წარმატებით დასრულება საქართველოს ეკონომიკაში ასეულობით მილიონი ევროს ინვესტიციის, ათასობით სამუშაო ადგილის შექმნის, ახალი თანამედროვე ტექნოლოგიების განვითარებისა და ქვანახშირის მოპოვებისას უსაფრთხოების კიდევ უფრო ზრდას განაპირობებს.
ჰოლდინგი "საქართველოს ინდუსტრიული ჯგუფი" წარმოადგენს ყველაზე მსხვილ ჯგუფს, რომელიც დაარსდა 2006 წელს და უკვე განახორციელა ათობით მილიონის ინვესტირება საქართველოს ეკონომიკაში. ჰოლდინგი აერთიანებს და მართავს კომპანიებს ენერგეტიკის, ბუნებრივი რესურსების მოპოვება-დამუშავების, სამშენებლო მასალების წარმოების, ლოჯისტიკური მომსახურების, დეველოპმენტის, მედიაბიზნესის და სხვა სფეროებში.