ხვალ, 3 თებერვალს, 11:00 საათზე, სოფლის მეურნეობის მინისტრი ბაკურ კვეზერელი და შიდა ქართლის გუბერნატორი ზურაბ არსოშვილი გორში საკონსერვო ქარხანა "კულას" ეწვევიან. საწარმო წვენებთან ერთად სოკოს წარმოებასა და ისრაელში ამ პროდუქციის გატანას გეგმავს.
განახლებული საკონსერვო ქარხანა ფერმერმა ივანე გოგლიძემ გასული წლის სექტემბერში გახსნა და მასში 226, 492 ათასი დოლარის ინვესტიცია განახორციელა. გოგლიძემ ADA-ს გრანტის ფარგლებში გამოყოფილი 150 000 დოლარი ავტომატური დაპაკეტების, სახურავების მოსარგების, ეტიკეტების მისაკრობი სისტემის შესაძენად და ახალი სამუშაო ადგილების შესაქმნელად გამოიყენა.
განახლებული ქარხანა სხვადასხვა სახის წვენს, ჯემებსა და დაკონსერვებულ ბოსტნეულს უშვებს. ქარხანაში 48 ადგილობრივია დასაქმებული. ამასთან, აღნიშნული პროექტის განხორციელებით, 300-მდე ფერმერი თავისი პროდუქციის რეალიზებას ახერხებს.