საქართველოს პრეზიდენტი ქვეყანაში სურსათის დეფიციტის შექმნას და ამ მიმართულებით გასული საუკუნის 90-იანი წლებში შექმნილი ვითარების განმეორებას გამორიცხავს.
"ხალხს, სამწუხაროდ, აქვს 90-იანი წლების გამოცდილება, მაგრამ არსებულ პირობებში ეს ნამდვილად გამორიცხულია. მაშინ ჩვენ არ გვქონდა სახელმწიფო პოლიტიკა (სახელმწიფო არ გვქონდა, არათუ პოლიტიკა) და სრულიად უპასუხისმგებლო იყო ფისკალური ინსტიტუტები, დღეს კი ეს პრობლემა არ არის, თუმცა რა თქმა უნდა, პრობლემები არსებობს", - განაცხადა სააკაშვილმა მთავრობის ეკონომიკურ გუნდთან შეხვედრაზე და მინისტრთა კაბინეტს სიფხიზლისკენ მოუწოდა, რათა "შიდა ფაქტორებით ეს პრობლემები არ გავაღრმაოთ".
აღსანიშნავია, რომ სოფლის მეურნეობის მინისტრ ბაკურ კვეზერელის განცხადებით, ქვეყანაში პირველადი მოხმარების პროდუქტების საკმარისი მარაგი არსებობს. რაც შეეხება გაზრდილ ფასებს, მთავრობა მათი ღირებულების შემცირებას აპრილ-მაისიდან ვარაუდობს, როცა ქვეყანაში მოსავლის აღების სეზონი დაიწყება.