საქართველოს აქვს შანსი, რომ 2011 წელს სიმინდის ექსპორტი დაიწყოს. ამის შესახებ სოფლის მეურნეობის მინისტრმა ბაკურ კვეზერელმა საქართველოს პრეზიდენტთან შეხვედრისას განაცხადა. მინისტრის თქმით, ქვეყანაში სიმინდის პროგრამაზე მუშაობა დაწყებულია და პროგრამაში მონაწილეობის მსურველთა რეგისტრაცია გრძელდება.
"ეს პროგრამა სიმინდის გასამმაგებულ მოსავალს მოგვცემს. შესაბამისად, შემოსავლები გაუსამმაგდება თითოეულ იმ საწარმოსა და ადამიანის, რომელიც ამ პროგრამაში მონაწილეობს. ჩვენ ვთავაზობთ მომსახურების მთელ პაკეტს. გვაქვს შანსი წელს პირველად სიმინდი ექსპორტზე გავიტანოთ და წელს პირველად გავხდებით სიმინდის ექსპორტიორი", - განაცხადა კვეზერელმა.
მინისტრის თქმით, სოფლის მეურნეობის სამინისტრო ყველაფერს აკეთებს იმისათვის, რომ პროგრამის შეახებ ხალხს ინფორმაცია დეტალურად მიეწოდოს.
"ყოველდღიულად სოფლებში გასვლები გვაქვს, რომ ხალხი იყოს ინფორმირებული, მაგრამ იმდენად იზრდება მოსავლიანობა, რომ ცოტა ძნელია ამის დაჯერება და გლეხების დარწმუნება, თუმცა ეს ნამდვილად ასეა. ჩვენ 2-3 წელიწადს ვაკვირდებოდით ამ პროცესს და დღეს უკვე დანამდვილებით შეგვიძლია ვთქვათ, რომ ნამდვილად მინიმუმ გაუსამმმაგებს მოსავალი ხალხს. ვმუშაობთ იმაზედაც, რომ კონსულტაცია გავუწიოთ მოსახლეობას, რათა მათ არ მოუვიდეთ შეცდომა და მიიღონ სამჯერ მეტი მოსავალი", - განაცხადა კვეზერელმა პრეზიდენტისა და ეკონომიკური გუნდის მინისტრების შეხვედრისას.
შეგახსენებთ, რომ სს "საქართველოს სოფლის მეურნეობის კორპორაციამ" საქართველოში 2000 ტონა ხორბლის თესლის იმპორტი განახორციელა, რომლის რეალიზაცია ადგილობრივ ფერმერებზე 13-თვიანი კონსიგანაციის და პირდაპირი ანგარიშსწორების პირობებით მოხდება.
კორპორაციამ ახალი ჯიშის ხორბლის თესლის შემოტანა საქართველოში არსებული ხორბლის დაბალი მოსავლიანობის გამო გადაწყვიტა, რომლის ძირითად მიზეზად შეიძლება დასახელდეს ქვეყანაში ხორბლის წარმოება მოძველებული სათესლე მასალის კვლავწარმოებით.
პროექტის ფარგლებში შეირჩა ხორბლის თესლის ამერიკული წარმოშობის ჯაგერის ჯიშის თესლი, რომელიც ხასიათდება შემდეგი ხარისხობრივი მაჩვენებლებით: არაგენმოდიფიცირებული, მაგარი, წითელი ფერის, საშემოდგომო, ფხიანი, ნახევრად ჯუჯა, რომელიც სწორი/გამართული ზრდით ხასიათდება.
პროექტით გათვალისწინებული თესლის რაოდენობა გათვლილია 10 000 ჰა მიწის ფართობზე დასათესად. ფერმერთა მხრიდან შესყიდვის სურვილის მიხედვით და განაცხადების გათვალისწინებით, ხორბლის დათესვა მოხდება ქვეყნის სამ რეგიონში: კახეთში, ქვემო ქართლში და შიდა ქართლში.
სამივე რეგიონში ამ პროექტისთვის დაქირავებულია რეგიონალური საკონსულტაციო ფირმები, რომლებიც ხორბლის განაწილების პროცესში კოორდინაციას და რეკომენდაციას გაუწევენ თითოეულ ფერმერს. მათი წარმომადგენლები რეგიონებში მოახდენენ მიწის ნაკვეთების შერჩევით დათვალიერებას და ზოგადი რეკომენდაციების მომზადებას, შემდგომში ფერმერებში გავრცელების მიზნით. ასევე რეგიონებში შექმნილია ოთხი საჩვენებელი მიწის ნაკვეთი, სადაც ფერმერებისთვის მოეწყობა მინდვრის დღეები.
აღნიშნული პროექტის საბოლოო მიზნებია ქვეყანაში ხარისხიანი ხორბლის თესლის მნიშვნელოვანი მატება, სერთიფიცირებული პროდუქტის პოპულარიზაცია ფერმერთა შორის და ფერმერებისთვის ხორბლის წარმოების ახალი ტექნოლოგიებისა და რეკომენდაციების გაცემა.