“არავითარი კავშირი შალვა პაპუაშვილს, რომელიც შირაქის ველზეა გაჭრილი, არ აქვს ტულსი გაბარდთან. ეს ისეთივე აბსურდია, როგორც ამბავი, თითქოს ტრამპი დიფსტეიტთან ერთად უტევდა “ოცნებას” 2018 წელს.” - ამის შესახებ “ნაციონალური მოძრაობის” ლიდერმა, ლევან სანიკიძემ განაცხადა.
“2018 წელს ვინ იყო აშშ-ის პრეზიდენტი? დონალდ ტრამპი ხომ იყო? დიფსტეიტი და დონალდ ტრამპი ერთდროულად უტევდნენ “ქართულ ოცნებას”? მაშინ ტრამპი დიფსთეისტს მონობაში ჰყავდა? - ეს ერთი და მეორე, კონკრეტული ფაქტები როდესაც არსებობს, ირაკლი კობახიძეს დაუმონტაჟეს გავრილოვთან ჭიქის მიჭახუნების კადრები? ზვიად გამსახურდიას სავარძელში რომ საჯდომი ჩაადებინეს ოკუპაციის შესახებ კანონის დამრღვევს და აფხაზეთის ამღიარებელს, ესეც მოგველანდა? დიფსტეიტმა დადგა ესეც? თუ ქართველი სამხედროების სიები რომ გადასცეს რუსეთის ფედერაციას ესეც მოგველანდა თუ მოვიგონეთ? ეს არის ამოუწურავი ფაქტების სია და არავითარი კავშირი შალვა პაპუაშვილს, რომელიც შირაქის ველზეა გაჭრილი, არ აქვს ტულსი გაბარდთან, არავითარი კავშირი არ აქვს, როგორც თქვენ არ გაქვთ არავითარი კავშირი ობამასთან, ისე არ აქვს შალვა პაპუაშვილს კავშირი ტულსი გაბარდთან.
თქვენ გგონიათ, რომ არცერთი ნაბიჯი არ გადაუდგამს “ოცნებას” რუსული? ჩვენ გვაქვს სია, რომელსაც პროექტის სახით გაჩვენებთ ძალიან მალე თუ რა გაუკეთებია რუსული “ოცნებას” 2013 წლიდან 2025 წლამდე, ოღონდ მხოლოდ ფაქტებზე იქნება დაფუძნებული. მაგალითად ტრისტან წითელაშვილის შეშვება საქართველოს შეიარაღებული ძალების გასაიდუმლოებულ ქართულ ბაზებზე, იყო თუ არა რუსული ქმედება? ჩახალიანის გამოშვება, რომელიც არის სეპარატისტი და ჯავახეთის სეპარაციის მომხრე იყო, არის თუ არა პრორუსული ქმედება? იმ კაცის გენერალურ პროკურორად დანიშვნა, რომელიც ახლა კრემლის კიბეებთან ზის და იბარებს პუტინთან ერთად სამხედრო მარშს, არის თუ არა რუსული ქმედება? საქართველოს აქტუალიზაციის გაქრობა, რომ საქართველო არის დიდი სოფელი თურმე და ნაკლები აქტუალიზაცია უნდა მოხდეს აფხაზეთის და ე.წ სამხრეთ ოსეთის თემის, არის თუ არა რუსული ქმედება? ეს არის მინიმალური ჩამონათვალი და უბრალოდ მთელი დღე უნდა ვიდგე აქ და მთელი დღე უნდა ვიძახო ეს ნაბიჯები და ვფიქრობ, ეს ყველაფერი საკმარისია იმისთვის, რომ “ოცნების” მავნე ტყუილი არ დაიჯეროს ხალხმა, მაგრამ ამ განცხადებაში იცით რას ამბობენ? 2018 წლამდე კი ბატონო, არ ვიყავით პრორუსებიო, მაგრამ შემდეგ გავპრორუსდითო.
განსხვავებული აზრის გამო ხალხს იჭერდნენ, თავს უხეთქავდნენ, სახლებთან ხვდებოდნენ და ახლა განსხვავებულ აზრს თურმე პრორუსულს რომ დაუძახებ, თურმე ბულინგის ქვეშ არიან ზონდერ ჯგუფებით შეიარაღებული პატარა ბიჭები, - განაცხადა ლევან სანიკიძემ.
შეგახსენებთ, დღეს შალვა პაპუაშვილმა ეროვნული დაზვერვის ხელმძღვანელის, ტულსი გაბარდის განცხადებასთან დაკავშირებით დაწერა „აშშ-ის ახალი ადმინისტრაციის მიერ „რუსული ჩარევის“ საუკუნის კონსპირაციის მხილებამ დაადასტურა, რომ „რუსულის“ იარლიყის მიკერება ერთ ცენტრში ჩამოყალიბებული ტაქტიკაა, რომელსაც სხვა ქვეყნებში, მოსყიდული პოლიტიკოსებით და „ენჯეოებით“ ნერგავენ".
