სალიზინგო სექტორის განვითარებისათვის ახალ კონცეფციაზე მუშაობა იწყება. კონცეფციის მიხედვით ჩამოყალიბდება, ახალი საკანონმდებლო ბაზა, რომელიც აქტივების დაფინანსების ახალი წყაროების შექმნას, პროდუქტების განვითარებასა და ამ სფეროში ახალი ტიპის ინვესტიციების მოზიდვას შეუწყობს ხელს.
ახალ სალიზინგო კანონმდებლობაზე სასაუბროდ ფინანსთა მინისტრი დღეს სალიზინგო ბაზრის მთავარ მოთამაშეებს შეხვდა და დაგეგმილი რეფორმები მათთან ერთად განიხილა.
ფინანსთა მინისტრი ამბობს, რომ ახალი საკანონმდებლო ინიციატივა 2-3 თვეში შემუშავდება.
"სალიზინგო კომპანიის წარმომადგენლებთან შეხვედრის მიზანია, რომ საქართველოში სალიზინგო კანონმდებლობა განვითარდეს. სალიზინგო კომპანიებთან ერთად შევეცდებით, რომ კანონმდებლობაზე 2-3 თვის განმავლობაში ვიმუშაოთ, რომელშიც უცხოელი ექსპერტებიც ჩართვებიან. ჩვენი მიზანია, რომ სალიზინგო სექტორი განვითარდეს, რაც თავის მხრივ საშუალებას მოგვცემს, რომ დაზგა-დანადგარებისა და სხვა ტექნიკა უფრო იაფად იქნეს შეძენილი. რაც თავის მხრივ ბიზნესის ადვილად დაწყების საშუალებას იძლევა",- განაცხადა კახა ბაინდურაშვილმა.
სალიზინგო ბაზრის წარმომადგენლები აცხადებენ, რომ კანონმდებლობის დახვეწის შემდეგ თავად სალიზინგო მომსახურეობის ტარიფებიც გაიაფდება.
"ახალი კანონმდებლობის მიღები შემდეგ, საქართველოში ჩვენთვის საინტერესო მწარმოებლების შემოსვლა უფრო გააქტიურდება და ეს კომპანიების ბრუნვას გაზრდიან, ეს კი ამ აქტივებზე ფასების დაწევას შეუწყობს ხელს. რაც საბოლოო ჯამში კომპანიებისათვის მეტი სტიმული ინება, რომ ფიქსირებულ აქტივებში მეტი დააბანდონ"- აცხადებს "თიბისი ლიზინგის" დირექტორი ნანა მიქაშავიძე.
"საქართველოს სალიზინგო კომპანიის" დირექტორი აცხადებს, რომ სექტორს ძირითადად საგადასახადო პრობლემები აწუხებდა და ეს ყველაფერი კი მის განვითარებას აჭიანურებდა.
"პრობლემები ძირითადად საგადასახადო კუთხით არსებობს და საჭიროა მისი შეცვლა. კანონმდებლობის შეცვლა კი ნიშნავს იმას, რომ ბიზნესის განვითარება მოხდება და საშუალება მოგვეცემა ძირითადი საშუალებები ვიყიდით და მცირე და საშუალო ბიზნესი განვითარდეს. ლიზინგი ეს არის მსოფლიოში განვითარებული დაფინანსების მეთოდი. დღემდე ლიზინგით ხდებოდა ძირითადი საშუალებების შეძენა, მაგალითად სამშენებლო, სამედიცინო დანადგარები, მსუბუქი ავტომობილები და სხვა სატრანსპორტო საშუალებები",- განაცხადა "საქართველოს სალიზინგო კომპანიის" დირექტორმა თინათინ გობეჯიშვილმა.
"ლიზინგი საქართველოში 2004 წლიდან არსებობს, მაგრამ იმის გამო რომ დღემდე ისეთი საკანინმდებლო ბაზის შექმნა ვერ მოხერხდა, სექტორის განვითარება შეფერხდა.
ფინანსთა სამინისტროს ინიციატივით, ლიზინგის კანონი თავიდან იწერება, როგორც კომერციული სამართლის, ასევე საგადასახადო რეგულირების მიმართულებითაც. ლიზინგის განვითარება, რომ ეკონომიკის განვითარების მნიშვნელოვანი მამოძრავებელი ძალაა, ამას აჩვენებს სტატისტიკური მონაცემები იმ ქვეყნებისა, სადაც ლიზინგის შეღწევადობა მაღალია. ლიზინგის განვითარება საჭიროა იმისათვის, რომ მეწარმეებმა ალტერნატიული დაფინანსების წყაროს მეშვეობით ისარგებლონ"- აცხადებს "თიბისი ლიზინგის" ხელმძღვანელი.
ფინანსთა სამინისტროში ფიქრობენ, რომ ახალი პროექტი ხელს შეუწყობს საქართველოს ეკონომიკური განვითარებას, რათა სალიზინგო ბაზრის განვითარებას მნიშვნელოვანი სტიმული მიეცეს.
სამინისტროში განმარტავენ, რომ ახალი კანონმდებლობა ხელს შეუწყობს: ტექნიკის შეძენის ფინანსირების ალტერნატიული, საბანკო სესხებზე იაფი ინსტრუმენტის ჩამოყალიბებას; საერთაშორისო მწარმოებლების ინტერესის გაზრდას საქართველოს ბაზარზე. ეს გაზრდის მათ მიერ საქართველოში იმპორტის მოცულობას და მათ პროდუქციაზე ფასების ხელმისაწვდომობას; საქართველოში სალიზინგო ტრანზაქციების შესაძლებლობის შექმნას, რაც დარგის რეგიონალური განვითარების შესაძლებლობას იძლევა.
კონსულტაციების შედეგად შექმნილი კანონპროექტი ფინანსთა სამინისტროსა და სებ-თან შეთანხმდება და დასამტკიცებლად პარალამენტს გადაეგზავნება.