ევროკავშირის ქვეყნების ლიდერებმა კომენტარი გააკეთეს აშშ-ის პრეზიდენტის განცხადებაზე, რომლის მიხედვითაც ის 1 აგვისტოდან ევროკავშირიდან იმპორტირებულ საქონელზე 30%-იან ტარიფებს დააწესებს.
საფრანგეთის პრეზიდენტმა ემანუელ მაკრონმა განაცხადა, რომ „კატეგორიულად არ ეთანხმება“ ტრამპის მიერ მიღებულ გადაწყვეტილებას.
„ახლა უფრო მეტად, ვიდრე ოდესმე, მნიშვნელოვანია, რომ ევროკომისიამ დაარწმუნოს ევროკავშირი ევროპის ინტერესების მტკიცედ დაცვის მზადყოფნაში. კერძოდ, ეს ნიშნავს შესაბამისი საპასუხო ზომების მომზადების დაჩქარებას... საფრანგეთი სრულ მხარდაჭერას უცხადებს ევროკომისიას მოლაპარაკებებში, რომლებიც ახლა ინტენსიური გახდება, რათა 1 აგვისტომდე მიღწეულ იქნას ურთიერთმისაღები შეთანხმება“, - განაცხადა მაკრონმა.
ესპანეთის პრემიერ-მინისტრმა პედრო სანჩესმა ასევე ხაზგასმით აღნიშნა, რომ მადრიდი მხარს დაუჭერს ევროკომისიას შეერთებულ შტატებთან შემდგომ მოლაპარაკებებში.
„ეკონომიკური გახსნილობა და ვაჭრობა სიმდიდრეს წარმოქმნის. დაუსაბუთებელი ტარიფები მას ანადგურებს... ერთად, ევროპელები მსოფლიოში ყველაზე დიდ სავაჭრო ბლოკს წარმოადგენენ.
ჩვენ ეს ძალაუფლება სამართლიანი შეთანხმების მისაღწევად უნდა გამოვიყენოთ“, - განაცხადა სანჩესმა.
„მიუხედავად იმისა, რომ ნათელი იყო, რომ ყველა ვარიანტი განხილული იყო, ევროკავშირმა ნათლად გამოხატა თავისი უპირატესობა შეთანხმებაზე, რომელიც თავიდან აიცილებდა ესკალაციას. და ეს პოზიცია უცვლელი რჩება... ევროკავშირი და აშშ პარტნიორები უნდა იყვნენ და არა მეტოქეები. ნამდვილი პარტნიორობა ყველა მხარეს წაადგება“, - განაცხადა ირლანდიის პრემიერმა მიხოლ მარტინმა.
შვედეთის პრემიერ-მინისტრმა ულფ კრისტერსონმა ტრამპის განცხადების გამო სინანული გამოთქვა.
„ჩვენ მხარს ვუჭერთ ევროკომისიის სურვილს, გააგრძელოს მოლაპარაკებების გზით გადაწყვეტის ძიება. ევროკავშირი მზადაა, საჭიროების შემთხვევაში მკაცრი კონტრზომებით უპასუხოს. თუმცა, „სავაჭრო ომის“ ესკალაციის შედეგად ყველა წააგებს და ამერიკელი მომხმარებლები ყველაზე მაღალ ფასს გადაიხდიან. შვედეთი თავისუფალი ვაჭრობისა და საერთაშორისო თანამშრომლობის მომხრეა“, - აღნიშნა მან.
შეგახსენებთ, რომ 12 ივლისს აშშ-ის პრეზიდენტმა დონალდ ტრამპმა განაცხადა, რომ 1-ელი აგვისტოდან ევროკავშირის ქვეყნებიდან და მექსიკიდან იმპორტზე 30%-იანი გადასახადი ამოქმედდება.
