არავინ არ იცის ვინ რა წერილი დაწერა. მე არც არაფერს უარვყოფ, არც არაფერს ვამტკიცებ. საერთოდ, პოლიტიკოსის საქმე არ არის, გამოიყენოს ეს ვითარება, უბედურება იმისთვის, რომ დივიდენდი მიიღოს, - ამის შესახებ პარლამენტის პირველმა ვიცე-სპიკერმა, გია ვოლსკიმ ჟურნალისტებთან განაცხადა. ის აჭარის მთავრობის მეთაურის თორნიკე რიჟვაძის საქმესა და მედიაში გავრცელებულ წერილს გამოეხმაურა.
მისი თქმით, გამოძიებას უნდა დაველოდოთ.
„თქვენ ისე სვამთ შეკითხვას, თითქოს, ფაქტია, რომ ეს მისი დაწერილი წერილია. მე შემიძლია პოლიტიკური და ადამიანური განცხადება გავაკეთო, რომ გამოჯანმრთელებას ვუსურვებ თორნიკე რიჟვაძეს, რომელსაც კარგად ვიცნობ. ვინ, ვის რა დააბრალა - ამასთან დაკავშირებით პოლიტიკოსებს ნუ ექნებათ გარკვეული პრეტენზია, რომ ჩაერთონ იმისთვის, რომ ვითარება დაძაბონ ან პირიქით - რაღაცა გააუბრალოონ. მიმდინარეობს საკმაოდ სერიოზული გამოძიება და დაველოდოთ...
ეგ არავინ არ იცის ვინ რა წერილი დაწერა. მე არც არაფერს უარვყოფ, არც არაფერს ვამტკიცებ. საერთოდ, პოლიტიკოსის საქმე არ არის, გამოიყენოს ეს ვითარება, უბედურება იმისთვის, რომ დივიდენდი მიიღოს. გამოძიება გვაჩვენებს შედეგებს. იქამდე არ მაქვს კომენტარი გარდა იმისა, რომ თორნიკე რიჟვაძეს გამოჯანმრთელებას ვუსურვებ და მის ოჯახს ვუსურვებ, რომ გვერდით ჰყავდეთ... მედია ვალდებულია, თუ კი რამე რეალური ჩაუვარდება ხელში, გამოაქვეყნოს და გამოძიება ვალდებულია, რომ დაადასტუროს არის თუ არა ეს წერილი თორნიკეს დაწერილი. თუ მისი დაწერილია, მაშინ გაარკვიოს ვინ რას აბრალებდა და საერთოდ რა მოხდა იქ“, - განაცხადა გია ვოლსკიმ.
