ნატო-ს გენერალურმა მდივანმა მარკ რუტემ განაცხადა, რომ მას ესმის აშშ-ის ადმინისტრაციის სურვილი, უპირველეს ყოვლისა, საკუთარი ინტერესები გაითვალისწინოს, მაგრამ ამავდროულად მოუწოდებს უკრაინისთვის სამხედრო მხარდაჭერის გაგრძელებისკენ. ამის შესახებ რუტემ Fox News-თან ინტერვიუში ისაუბრა.
„ მე სავსებით მესმის, რომ აშშ-მა უნდა უზრუნველყოს, რომ მისი ინტერესები იყოს დაცული. თუმცა, როდესაც საქმე უკრაინას ეხება, მოკლევადიან პერსპექტივაში უკრაინა ვერ გაძლებს ყველა იმ მხარდაჭერის გარეშე, რაც მას საბრძოლო მასალისა და საჰაერო თავდაცვის სისტემების მხრივ შეუძლია მიიღოს“, - თქვა რუტემ.
რუტემ გაიხსენა, რომ გასულ კვირას ნატოს სამიტის ფარგლებში უკრაინისა და აშშ-ის პრეზიდენტები შეხვდნენ ერთმანეთს და „ძალიან კარგი დისკუსია გამართეს, კერძოდ, საჰაერო თავდაცვის სისტემებთან დაკავშირებით“.
„დიახ, მესმის, რომ შეერთებულმა შტატებმა უნდა იზრუნოს თავისი იარაღის მარაგებზე. ამავდროულად, ჩვენ გარკვეული მოქნილობა უნდა დავუშვათ“, - მიიჩნევს ნატო-ს გენერალური მდივანი.
მარკ რუტემ ასევე აღნიშნა, რომ ევროპული სახელმწიფოები ზრდიან თავდაცვის ხარჯებს და უკრაინის დახმარებას, მაგრამ „ჩვენ ვერ გავძლებთ აშშ-ის პრაქტიკული მხარდაჭერის გარეშე“.
„ეს ასევე აშშ-ის ინტერესებშიცაა, რომ უკრაინამ არ წააგოს ეს ომი… უსაფრთხო ევროპა ასევე ნიშნავს უსაფრთხოებას აშშ-ისთვის. ეს ყველაფერი ურთიერთდაკავშირებულია“, – აღნიშნა ალიანსის გენერალურმა მდივანმა.
