საქართველო მსოფლიო დონის სამთო-სათხილამურო კურორტის, კურშაველის გამოცდილების გაზიარებას გეგმავს. ამ მიზნით ეკონომიკისა და მდგრადი განვითარების მინისტრის მოადგილე არჩილ კეკელია საფრანგეთის ქალაქ კურშაველში იმყოფებოდა.
კურშაველის, როგორც კურორტის განვითარება მეორე მსოფლიო ომის შემდეგ დაიწყო. დღეს კი ამ კურორტს მილიონობით ტურისტი სტუმრობს.
კურშაველში ვიზიტისას საქართველოს დელეგაცია ქალაქის მერის მოადგილეს ჟან კრისტოფ ვიდონს, საზოგადოება "Des Trois Vallees "-ის ხელმძღვანელს, კლოდ ფორსა და კომპანია France Neige International"-ის დირექტორს, ბენოი რობერტს შეხვდა. შეხვედრისას საუბარი შეეხო სათხილამურო ტრასების და საბაგიროების ოპერირებას და კურშაველის მაგალითზე მესტიის კურორტის განვითარების საკითხს.
უკვე ცნობილია, რომ უახლოეს ხანებში ქართული დელეგაციის მოწვევით საქართველოში კურშაველის მერი, ადგილობრივი ხელისუფლებისა და ორგანიზაციების წარმომადგენლები და საქართველოთი დაინტერესებული ინვესტორები ჩამოვლენ.
