ანაკლია-ზუგდიდის თავისუფალი ტურისტული ზონის მშენებლობაში მონაწილეობის მსურველი კომპანიების განაცხადის მიღების ვადა 30 იანვარს იწურება. ეკონომიკისა და მდგრადი განვითარების სამინისტროს ინფორმაციით, ანაკლიის ტურისტულ ზონისადმი ინტერესი ამ დროისათვის 8 კომპანიამ გამოთქვა, საიდანაც 4 უცხოური კომპანიაა.
სამინისტროს ინფორმაციით, ანაკლიაში სასტუმროების აშენების სურვილი ოფიციალურად გამოთქვეს კომპანიებმა ჰონკონგიდან, გაერთიანებული ემირატებიდან, ინგლისიდან და თურქეთიდან.
მთავრობის ინფორმაციით, საქართველოს შავიზღვისპირეთის მთავარი მარგალიტის, ანაკლიის მშენებლობა უკვე დაიწყო. საუკეთესო საზღვაო კლიმატის მქონე სანაპირო ზოლზე, სახელმწიფო სასტუმროების მშენებლობისთვის უპრეცედენტო პირობებია. ინვესტორი მიწას, სასტუმროს პროექტებს და ყველა კომუნიკაციას სახელმწიფოსგან საჩუქრად მიიღებს. იმავდროულად, ინვესტორი 15 წლით მოგებისა და ქონების გადასახადისგან გათავისუფლება. ინვესტორებისთვის გადასაცემი უფასო მიწის ნაკვეთები განლაგებულია ესპანელი არქიტექტორების დაპროექტებული ბულვარის გასწვრივ. სახელმწიფო ახალ კურორტზე მინერალურ წყალს უფასოდ მიიყვანს, ანაკლია-ზუგდიდის ტურისტულ ზონაში აშენდება ახალი აეროპორტი და იახტკლუბი.
"ქობულეთის თავისუფალ ტურისტულ ზონაში" სასტუმროების მშენებლობით დაინტერესებულ ფიზიკურ და იურიდიულ პირთაგან განაცახდების მიღების ვადა 28 თებერვლს იწურება.