ამერიკის შეერთებული შტატების პრეზიდენტმა დონალდ ტრამპმა განცხადება გააკეთა უკრაინისა და რუსეთის ლიდერებს შორის თურქეთში შესაძლო შეხვედრასთან დაკავშირებით, რომელიც, შესაძლოა, ხუთშაბათს, 15 მაისს სტამბოლში გაიმართოს.
„მე დაჟინებით მოვითხოვდი ამ შეხვედრის გამართვას. ვფიქრობ, რომ ამ შეხვედრამ შესაძლოა, კარგი შედეგები გამოიღოს“, - განაცხადა მან პრესკონფერენციაზე.
ტრამპმა აღნიშნა, რომ ომში კვირაში 5 000 რუსი და უკრაინელი ჯარისკაცი იღუპება.
„ისინი ამერიკელი ჯარისკაცები არ არიან, ისინი რუსეთიდან და უკრაინიდან არიან, მაგრამ ისინი ადამიანები არიან. ისინი იხოცებიან ისეთი მასშტაბით, როგორიც მეორე მსოფლიო ომის შემდეგ არ გვინახავს“, - განაცხადა ამერიკის პრეზიდენტმა.
გარდა ამისა, ტრამპმა განაცხადა, რომ ის განიხილავს სტამბოლში ჩასვლის შესაძლებლობას, სადაც უკრაინასა და რუსეთს შორის შეხვედრაა დაგეგმილი.
„პრეზიდენტი ერდოღანი შესანიშნავი მასპინძელი იქნება. ვფიქრობ, ხუთშაბათს თურქეთში რუსეთსა და უკრაინას შორის შეხვედრას კარგი შედეგების მოტანა შეუძლია. და მე ვვარაუდობ, რომ ორივე ლიდერი იქ იქნება. ვფიქრობ, ჩავიდე იქ. არ ვიცი, ხუთშაბათს სად ვიქნები, იმდენი შეხვედრა მაქვს. მაგრამ იქ ჩასვლაზე ვფიქრობდი.
არსებობს შანსი, რომ ეს მოხდეს, თუ მე ვიფიქრებ, რომ ყველაფერი შესაძლებელია მოხდეს. მაგრამ ჩვენ ეს უნდა გავაკეთოთ. როდესაც ბრძოლის ველის სატელიტურ ფოტოებს ხედავთ, გამოსახულებებს, ყველგან მოწყვეტილი კიდურები და თავებია. აქვს ამას აზრი? ამას არავითარი აზრი არ აქვს. ასე რომ ჩვენ ძალიან ბევრს ვმუშაობთ, რათა ვნახოთ, თუ შეგვიძლია ამ სისხლისღვრის დასრულება“, – განაცხადა ტრამპმა.
უახლოეს დღეებში დონალდ ტრამპს დაგეგმილი აქვს ვიზიტების საუდის არაბეთში, არაბთა გაერთიანებულ საამიროებსა და კატარში.
