რუსეთის პრეზიდენტის პრესმდივანმა დმიტრი პესკოვმა განაცხადა, რომ პუტინი უარყოფს 30-დღიანი ცეცხლის შეწყვეტის შესაძლებლობას, თუ დასავლეთი არ შეწყვეტს უკრაინისთვის იარაღის მიწოდებას. ამის შესახებ პესკოვმა ABC News-თან ინტერვიუში განაცხადა.
პესკოვმა განაცხადა, რომ კრემლი ამ ინიციატივის განხორციელებას შეუძლებლად მიიჩნევს, ვიდრე „რუსეთის ჯარები ფრონტის ხაზზე წინ მიიწევენ და ამას საკმაოდ თავდაჯერებულად აკეთებენ“.
მისი თქმით, ზავის დროს კი, დასავლური იარაღის მიწოდება შეერთებული შტატებიდან და ევროპის ქვეყნებიდან უნდა შეწყდეს.
„ეს უკრაინისთვის უპირატესობა იქნება. უკრაინა გააგრძელებს სრულ მობილიზაციას, ფრონტის ხაზზე ახალ ძალებს გადაისვრის.
ის ამ დროს ახალი ჯარისკაცების გაწვრთნისა და უკვე მებრძოლთა დასვენების უზრუნველსაყოფად გამოიყენებს. მაშ, რატომ უნდა მივცეთ უკრაინას ასეთი უპირატესობა?" - განაცხადა პუტინის პრესმდივანმა.
პესკოვი ასევე ამტკიცებს, რომ პუტინი, თითქოს „ყველაფერს აკეთებს პრობლემის მშვიდობიანი და დიპლომატიური გზით გადასაჭრელად“, მაგრამ „მშვიდობიანი და დიპლომატიური საშუალებების“ არარსებობის შემთხვევაში, მოსკოვი „იძულებულია გააგრძელოს სამხედრო ოპერაცია“.
