ბიზნესომბუდსმენის კანდიდატურაზე მიმდინარე კონსულტაციები ხვალ, 28 იანვარს დასრულდება და პრემიერ-მინისტრი ნიკოლოზ გილაური ბიზნესომბუდსმენის ვინაობას ხვალვე დაასახელებს. თუმცა მანამდე საქართველოს პალამენტში პარლამენტის თავმჯდომარის, დავით ბაქრაძისა და საქართველოს პრემიერ-მინისტრის, გილაურის შეხვედრა-კონსულტაცია იგეგმება, რომელიც 14:30 საათზე გაიმართება.
შეგახსენებთ, რომ 26 იანვარს ბიზნესომბუდსმენის კანდიდატურასთან დაკავშირებით ბიზნესგაერთიანებები პრემიერ-მინისტრს შეხვდნენ. როგორც პრემიერ-მინისტრის პრესსამსახურის უფროსმა ნიკო მჭედლიშვილმა ბიზნესმენებისა და მთავრობის მეთაურის შეხვედრის შემდეგ განაცხადა, გილაური ომბუდსმენის ვინაობას პარასკევს დაასახელებს.
"ომბუდსმენის თანამდებობაზე მთავარ კანდიდატურად დასახელებულია გიორგი პერტაია, რომელიც ამჟამად პრემიერ-მინისტრის მთავარი მრჩევლის მოვალეობას ასრულებს. სავარაუდოა, რომ სწორედ გიორგი პერტაია გახდება ბიზნესომბუდსმენი", - განაცხადა მჭედლიშვილმა.
ბიზნესის წარმომადგენლების განცხადებით, მათთვის მნიშვნელოვანია, რომ კერძო სექტორს გიორგი პერტაიასთან ურთიერთობის გამოცდილება უკვე აქვს. ბიზნესმენები ამბობენ, რომ მთავრობასთან დიალოგი უკვე დაწყებულია და ახლა მთავარი სიტყვა უკვე ბიზნესომბუდსმენმა უნდა თქვას.
"ბიზნესასოციაციის" სახელით მხარდაჭერა დავაფიქსირეთ გიორგი პერტაიას მიმართ. თუმცა მნიშვნელოვანია ასევე ის გახსნილი დიალოგი, რომელიც პრემიერთან დაიწყო. დღეს ბიზნესისა და პრემიერ-მინისტრის საკმაოდ ნაყოფიერი და შედეგიანი დიალოგი შედგა. საგულისხმოა, რომ თვითონ მთავრობის დამოკიდებულება იცვლება ბიზნესის მიმართ, რასაც მივესალმებით და იმედი გვაქვს, რომ ეს გახსნილობა შედეგს გამოიღებს. მნიშვნელოვანია, რომ ქვეყანაში ინვესტიციები გაიზარდოს. ბიზნესმა უნდა დაინახოს, რომ საქართველოში მეტი ინვესტირებისა და ფულის ჩადება შეიძლება", - განაცხადა "ბიზნესასოციაცის" პრეზიდენტმა გიორგი ჭირაქაძემ.
ბიზნესომბუდსმენის იმედი აქვთ საბანკო სექტორშიც. "ბანკების ასოციაციის" პრეზიდენტი ამბობს, რომ ბიზნესომბუდსმენის უფლებები იზრდება, რაც ბიზნესისა და მთავრობის ურთიერთობაში გარდამტეხი იქნება.
"ბიზნესომბუდსმენის ინსტიტუტის შემოღება საკმაოდ კარგია და კარგია ასევე იმ ფუქციების გადაცემა რაზედაც დღეს პრემიერ-მინისტრთან შეხვედრაზე ვისაუბრეთ. ამ ფუნქციებით აღჭურვილი ბიზნესომბუდსმენი ბიზნესის დახმარებას შეძლებს, რათა ის იყოს ხიდი ბიზნესსა და ხელისუფლებას შორის", - აცხადებს ზურაბ გვასალია.
