აშშ-ის პრეზიდენტმა დონალდ ტრამპმა განაცხადა, რომ რუსეთსა და უკრაინას შორის შესაძლო შეთანხმების უმეტესი დებულებები შეთანხმებულია. ამერიკელი ლიდერის თქმით, ახლა „ძალიან მაღალ დონეზე“ აუცილებელია ორ მხარეს შორის შეხვედრა.
„რუსეთთან და უკრაინასთან მოლაპარაკებებისა და შეხვედრების კარგი დღეა. ისინი ძალიან ახლოს არიან შეთანხმებასთან და ახლა ორივე მხარეს ძალიან მაღალ დონეზე შეხვედრა სჭირდება ამის დასასრულებლად“, - დაწერა ტრამპმა სოციალურ ქსელ Truth Social-ში.
„ძირითადი საკითხების უმეტესობაზე შეთანხმება მიღწეულია“, - ხაზგასმით აღნიშნა ტრამპმა.
ტრამპმა განაცხადა, რომ აშშ-ის ოფიციალური პირები „იქნებიან იქ, სადაც საჭიროა, რათა კონფლიქტი დასრულდეს“.
შეგახსენებთ, 25 აპრილს კრემლში ვლადიმირ პუტინსა და აშშ-ის პრეზიდენტის სპეციალურ წარმომადგენელს, სტივ უიტკოფს შორის შეხვედრა გაიმართა. რუსეთის პრეზიდენტის თანაშემწემ იური უშაკოვმა განაცხადა, რომ შეხვედრა კონსტრუქციული და სასარგებლო იყო და სამ საათს გაგრძელდა.
