სააგენტო Reuters-მა გამოაქვეყნა რუსეთ-უკრაინის ომის დასრულების წინადადების სრული ტექსტი, რომელიც აშშ-ის პრეზიდენტის წარმომადგენელმა სტივ უიტკოფმა 17 აპრილს პარიზში ევროპელ ოფიციალურ პირებს წარუდგინა და რომელიც მოიცავს აშშ-ის მიერ უკრაინის ოკუპირებულ ტერიტორიებზე რუსეთის კონტროლის აღიარებას.
შეერთებულმა შტატებმა ევროპელ ოფიციალურ პირებს წარუდგინა შეთანხმების პროექტი, რომელიც უკრაინაში რუსეთის ომის დასრულებას ითვალისწინებს.
დოკუმენტი შეიცავს მკაფიო პირობებს, რომლებიც, როგორც მითითებულია, ვაშინგტონის „საბოლოო შეთავაზებას“ წარმოადგენს ორივე მხარისთვის.
ტექსტის თანახმად, შეერთებული შტატები რუსეთსა და უკრაინას შორის მუდმივი ცეცხლის შეწყვეტის შეთანხმების ტექნიკურ განხორციელებაზე მოლაპარაკებების დაუყოვნებლივ დაწყებას სთავაზობს.
ორივე მხარე დაუყოვნებლივ დაიწყებს მოლაპარაკებებს შეთანხმების ტექნიკურ განხორციელებაზე, უკრაინის უსაფრთხოების გარანტიები, უკრაინა იღებს საიმედო უსაფრთხოების გარანტიებს, გარანტორი სახელმწიფოები შექმნიან სპეციალურ ჯგუფს ევროპული და არაევროპული სახელმწიფოების მონაწილეობით, უკრაინა ნატო-ში გაწევრიანებას არ შეეცდება, უკრაინას შეეძლება ევროკავშირისკენ სწრაფვა.
აშშ დე იურედ აღიარებს რუსეთის კონტროლს ყირიმზე, აშშ დე ფაქტოდ აღიარებს რუსეთის კონტროლს ლუჰანსკის ოლქზე, აშშ დე ფაქტოდ აღიარებს რუსეთის მიერ კონტროლირებადი ზაპოროჟიეს, დონეცკისა და ხერსონის ოლქების ნაწილებს, უკრაინა დაიბრუნებს ტერიტორიებს ხარკოვის ოლქში, უკრაინა დაიბრუნებს კონტროლს ზაპოროჟიეს ატომურ ელექტროსადგურზე, თუმცა სადგურს გააკონტროლებს და მართავს აშშ, ელექტროენერგია კი ორივე მხარეს გაუნაწილდება, უკრაინა დაუბრკოლებლად ისარგებლებს დნიპროზე გასასვლელით და გააკონტროლებს კინბურნის ცელას.
აშშ და უკრაინა მინერალური რესურსების სფეროში ეკონომიკურ თანამშრომლობას განახორციელებენ, უკრაინას სრულად აღადგენენ და ფინანსურ კომპენსაციას მიიღებს, რუსეთის წინააღმდეგ ამ კონფლიქტის შედეგად 2014 წლიდან დაწესებული სანქციები მოიხსნება, აშშ-რუსეთის ეკონომიკური თანამშრომლობა განახლდება ენერგეტიკისა და სხვა სამრეწველო სექტორებში.
