ლონდონში უკრაინაში მიმდინარე ომის დამთავრების შესახებ დაგეგმილ შეხვედრას აღარ დაესწრებიან გაერთიანებული სამეფოს, საფრანგეთის, უკრაინისა და გერმანიის საგარეო საქმეთა მინისტრებიც. ამის ნაცვლად ორმხრივი მოლაპარაკებები გაიმართება უკრაინისა და დიდი ბრიტანეთის საგარეო საქმეთა მინისტრებს შორის. ამის შესახებ Sky News წერს.
უკრაინის საგარეო საქმეთა მინისტრი ანდრიი სიბიჰა ლონდონში დევიდ ლემთან ორმხრივ შეხვედრაზე დარჩება.
მანამდე, გავრცელდა ცნობები, რომ შეხვედრაზე აღარ ჩავიდოდნენ აშშ-ს სახელმწიფო მდივანი მარკო რუბიო და ტრამპის სპეციალური წარმომადგენელი სტივ უიტკოფიც მას შემდეგ, რაც უკრაინამ უარი თქვა მედიაში გავრცელებულ დაუდასტურებელ ამერიკულ გეგმაზე, რომელიც სამშვიდობო შეთანხმების ფარგლებში ყირიმზე სავარაუდოდ რუსული ოკუპაციის აღიარებას ითვალისწინებს.
მას შემდეგ, რაც აშშ-ის სახელმწიფო მდივანმა მარკო რუბიომ უარი თქვა ლონდონში გაფრენაზე, მსგავსი გადაწყვეტილებები მიიღეს საფრანგეთისა და გერმანიის საგარეო საქმეთა მინისტრებმა.
მედიის ცნობით, რუბიომ უარი თქვა ლონდონში გაფრენაზე მას შემდეგ, რაც ვოლოდიმირ ზელენსკიმ უარყო ტრამპის ომის დასრულების გეგმის ერთ-ერთი მთავარი პუნქტი.
პარალელურად, გამოცემა Financial Times საკუთარ წყაროებზე დაყრდნობით წერდა, რომ პუტინმა აშშ-ს უკრაინაში მიმდინარე ომის ამჟამინდელ ფრონტის ხაზზე გაყინვა შესთავაზა.
