რომის პაპმა ფრანცისკემ სააღდგომო მიმართვაში მკაცრად დაგმო ანტისემიტიზმი და ომი ღაზას სექტორში.
"გამოვხატავ ჩემ თანაგრძნობას პალესტინასა და ისრაელში ქრისტიანების ტანჯვისადმი, ისევე როგორც მთელი ისრაელისა და პალესტინის მოსახლეობის მიმართ“, - განაცხადა რომის პაპმა.
მანამდე, რომის კათოლიკური ეკლესიის 88 წლის მეთაური წმინდა პეტრეს მოედანზე შეკრებილ მრევლს მიესალმა და ტრადიციული კურთხევა (Urbi et Orbi) წარმოთქვა.
მიმართვის ტექსტი არქიეპისკოპოსმა დიეგო ჯოვანი რაველიმ წაიკითხა.
რომის პაპმა „ანტისემიტიზმის მზარდ კლიმატს, რომელიც მთელ მსოფლიოში ვრცელდება“ შემაშფოთებელი უწოდა.
პაპის თქმით, მისი აზრები მიმართულია ღაზას ხალხზე, სადაც "მიმდინარე საშინელი კონფლიქტი იწვევს სიკვდილს და ნგრევას და დრამატულ და მიუღებელ ჰუმანიტარულ მდგომარეობას".
„მივმართავ კონფლიქტის მონაწილე მხარეებს, შეწყვიტონ ცეცხლი, გაათავისუფლონ მძევლები და დაეხმარონ შიმშილითა და მშვიდობიანი მომავლის წყურვილით დაავადებულ ადამიანებს!“
თავის მიმართვაში რომის პაპმა ასევე ახსენა იმენელი ხალხი, რომელიც ომის გამო მსოფლიოში ერთ-ერთი ყველაზე გაჭიანურებული კრიზისის პირობებში იმყოფება.
ის ასევე გამოვიდა მშვიდობის მოწოდებით უკრაინაში, სამხრეთ კავკასიაში, ასევე აფრიკის ქვეყნებში, კერძოდ კონგოს დემოკრატიულ რესპუბლიკაში, სუდანსა და სამხრეთ სუდანში.
პაპმა მოუწოდა მსოფლიო ლიდერებს, გამოიყენონ არსებული რესურსები გაჭირვებულთა დასახმარებლად, შიმშილთან საბრძოლველად და განვითარებაზე ორიენტირებული ინიციატივების ხელშესაწყობად.
