ცეცხლის შეწყვეტის შეთანხმების ფარგლებში, რუსეთი რუსული ავიახაზებისთვის აშშ-ის საჰაერო სივრცის გახსნის იდეით გამოდის, მაგრამ ევროკავშირი ამის წინააღმდეგია. ამის შესახებ გამოცემა Politico წერს.
როგორც გამოცემა აღნიშნავს, ევროკავშირი არ არის დაინტერესებული რუსეთის წინააღმდეგ საჰაერო სანქციების მოხსნით, ევროპის მონაწილეობის გარეშე კი რუსული ავიაკომპანიებისთვის აშშ-ში ფრენა ადვილი არ იქნება.
„პირველ რიგში, რუსეთის წინააღმდეგ მოქმედებს ევროკავშირის მკაცრი სანქციები, რომლებიც მოიცავს რუსული ავიახაზებისთვის ფრენის აკრძალვას ევროკავშირის საჰაერო სივრცეში“, - განუცხადა ევროკომისიის წარმომადგენელმა გამოცემას.
სანქციების შესახებ პოლიტიკური გადაწყვეტილებების გარდა, ევროკავშირის ოფიციალურმა წარმომადგენელმა ასევე მიუთითა უსაფრთხოების სერიოზულ საკითხებზე რუსული თვითმფრინავებისთვის ევროკავშირის საჰაერო სივრცის შესაძლო გახსნის შესახებ.
”არ არის ცნობილი, სათანადოდ იყო თუ არა უზრუნველყოფილი რუსული ავიახაზები და საჰაერო მიმოსვლის სერვისები ბოლო სამი წლის განმავლობაში, რაც სერიოზულ ეჭვს აჩენს რუსული ფლოტის ფრენისუნარიანობისადმი”, - თქვა მან.
უკრაინაში რუსეთის სრულმასშტაბიანი შეჭრის შემდეგ, რუსულ ავიახაზებს აეკრძალათ ევროკავშირისა და აშშ-ის საჰაერო სივრცეში ფრენა. რუსეთს ასევე დაებლოკა დასავლური თვითმფრინავების - Boeing-სა და Airbus-ის სათადარიგო ნაწილებზე წვდომა
ამავდროულად, საომარი მოქმედებების დასრულების შეთანხმების ფარგლებში რუსეთი ითხოვს შეერთებულ შტატებთან პირდაპირი ფრენების აღდგენას.
როგორც გამოცემა აღნიშნავს, რუსულ ავიაკომპანიებზე შეზღუდვების შემსუბუქების ნებისმიერი ნაბიჯი ზეწოლას მოახდენს ევროპულ ავიაკომპანიებზე, რომლებიც რუსეთის საჰაერო სივრცის გვერდის ავლის მიზნით, აზიაში ფრენისას დამატებით ხარჯების გამო დიდი ხანია უკმაყოფილებას გამოთქვამენ. ეს უპირატესობას ანიჭებს ჩინურ გადამზიდველებს.
თუმცა, მიუხედავად ამ მოსაზრებებისა, ბრიუსელი არ ჩქარობს მოლაპარაკებებს მოსკოვთან ევროპის საჰაერო სივრცისადმის წვდომის შესახებ, განსაკუთრებით რუსეთის ტერიტორიაზე ფრენების საშიშროების გამო.
