აშშ-ის პრეზიდენტმა დონალდ ტრამპმა განაცხადა, რომ თუ უკრაინა ან რუსეთი ძალიან გაართულებს მშვიდობის მიღწევის პროცესს , შესაძლოა ომის შეჩერების ძალისხმევა შეწყვიტოს. ტრამპმა ამის შესახებ თეთრ სახლში ჟურნალისტებს განუცხადა.
ტრამპს სთხოვეს კომენტარი აშშ-ის სახელმწიფო მდივნის მარკო რუბიოს განცხადებაზე, რომ შეერთებული შტატები მზადაა უარი თქვას უკრაინაში მშვიდობის მიღწევის მცდელობებზე, თუ „უახლოეს დღეებში“ დაინახავენ, რომ ამ მიმართულებით პროგრესი არ იქნება.
"დღეების გარკვეული კონკრეტული რაოდენობა არ არსებობს, მაგრამ სწრაფად [უნდა მოხდეს]. გვინდა, რომ ეს დავასრულოთ. აქ ვსაუბრობთ ადამიანებზე, რომლებიც იღუპებიან. დაახლოებით საშუალოდ 2 500 ახალგაზრდა ადამიანი, ჯარისკაცი. ისინი არ არიან ამერიკიდან, არ არიან არსაიდან გარდა უკრაინისა და რუსეთისა, მაგრამ ამ სიცოცხლეების გადარჩენა გვსურს და ჩვენ ამას შევაჩერებთ იდეალურ შემთხვევაში. თუ რომელიმე მხარე ამას ძალიან გაართულებს, ჩვენ უბრალოდ ვეტყვით, თქვენ შტერები ხართ, საშინელი ადამიანები ხართ და ამაზე უბრალოდ ხელს ავიღებთ. თუმცა, იმედია, ამის გაკეთება არ მოგვიწევს, მარკო მართალია, როდესაც ამბობს, რომ ამის დასრულება გვსურს". - თქვა ტრამპმა.
ამასთან, ტრამპმა თქვა, რომ აშშ არ მოითმენს სამშვიდობო ძალისხმევის შეფერხებას.
"მაგრამ მე ვფიქრობ, რომ ჩვენ გვაქვს ყველა შანსი ამ პრობლემის გადასაჭრელად“, - აღნიშნა პრეზიდენტმა.
