ნატო-ს გენერალურმა მდივანმა მარკ რუტემ განაცხადა, რომ უკრაინის გაწევრიანება ალიანსში შეუქცევადია, მაგრამ რუსეთთან სამშვიდობო შეთანხმების ნაწილი არ იქნება. ამის შესახებ რუტემ უკრაინულ მედიასთან ინტერვიუში ისაუბრა.
ნატო-ს გენერალურმა მდივანმა დაადასტურა, რომ ძალაში რჩება 2024 წლის ვაშინგტონის სამიტის გადაწყვეტილება, რომლის მიხედვითაც უკრაინის გზა ალიანსში წევრობისკენ შეუქცევადია.
„უკრაინის გზა ნატო-სკენ შეუქცევადია, ეს იყო ვაშინგტონის სამიტის შედეგი და არაფერი შეცვლილა. როდესაც ჩვენ ვთქვით, რომ უკრაინა ერთ მშვენიერ დღეს გახდება ნატო-ს წევრი, ჩვენ არასდროს დავპირებულვართ, რომ ეს იქნებოდა სამშვიდობო შეთანხმების ნაწილი“, - აღნიშნა რუტემ.
რუტეს თქმით, დასავლეთის მიზანია უკრაინისთვის „ნამდვილი მშვიდობის“ უზრუნველყოფა და არა კონფლიქტის მორიგი გაყინვა, რომელიც მინსკის შეთანხმებების მსგავსი იქნება.
„რა თქმა უნდა, ის, რაზეც ამერიკის პრეზიდენტი მუშაობს, არის უკრაინის მუდმივი, ხანგრძლივი მშვიდობა, არა მინსკი-3, არამედ რეალური ცეცხლის შეწყვეტა და სამშვიდობო შეთანხმება“, - თქვა რუტემ.
