აშშ-ის განათლების დეპარტამენტმა გამოაცხადა ჰარვარდის უნივერსიტეტისთვის 2,2 მილიარდი დოლარის ოდენობის სახელმწიფო დაფინანსების გაყინვა მას შემდეგ, რაც უნივერსიტეტმა უარყო ტრამპის ადმინისტრაციის მოთხოვნები. იუწყება Reiters
„ანტისემიტიზმთან ბრძოლის გაერთიანებული მიზნობრივი ჯგუფი აცხადებს 2,2 მილიარდი დოლარის გრძელვადიანი გრანტების და 60 მილიონი დოლარის გრძელვადიანი კონტრაქტების გაყინვას ჰარვარდის უნივერსიტეტისთვის“, - აღნიშნულია აშშ-ის განათლების დეპარტამენტის პრესრელიზში.
გასულ კვირას თეთრმა სახლმა ჰარვარდს გაუგზავნა მოთხოვნების სია, რომელიც ითვალისიწნებს უნივერსიტეტის მართვაში მთავრობის მკაცრ ზედამხედველობას და რადიკალურ ცვლილებებს.
თუმცა, ორშაბათს, 14 აპრილს, ჰარვარდმა უარყო ეს მოთხოვნები და განაცხადა, რომ დონალდ ტრამპის ადმინისტრაცია არღვევს აშშ-ს კონსტიტუციის პირველ შესწორებას, ამეტებს მთავრობის უფლებამოსილებას სამოქალაქო უფლებების აქტით და ემუქრება კერძო ინსტიტუტის ავტონომიას.
თავის მხრივ, აშშ-ის განათლების დეპარტამენტმა გამოაცხადა დაფინანსების გაყინვის შესახებ და განაცხადა, რომ სასწავლო პროცესის მიმდინარე შეფერხებები მიუღებელია.
„მიუღებელია საგანმანათლებლო პროცესის ჩაშლა, რომლის გამოც კამპუსებს ბოლო წლებში ზიანი ადგება. მიუღებელია ებრაელი სტუდენტების შევიწროება. დროა ელიტარულმა უნივერსიტეტებმა სერიოზულად მიიღონ ეს საკითხი და აიღონ ვალდებულება მნიშვნელოვანი ცვლილებების განხორციელებაში, თუ მათ სურთ გააგრძელონ გადასახადის გადამხდელთა მხარდაჭერა", - აღნიშნულია განათლების დეპარტამენტის განცხადებაში.
31 მარტს მედიამ გაავრცელა ინფორმაცია, რომ ტრამპის ადმინისტრაციამ დაიწყო ზომები ჰარვარდის უნივერსიტეტში ანტისემიტიზმის წინააღმდეგ საბრძოლველად, რამაც შეიძლება გამოიწვიოს ინსტიტუტის ფედერალური დაფინანსების 9 მილიარდი დოლარის გაყინვა.
მარტის ბოლოს, შეერთებული შტატების პრეზიდენტმა დონალდ ტრამპმა ხელი მოაწერა აღმასრულებელ ბრძანებას აშშ-ის განათლების დეპარტამენტის რეფორმების დასაწყებად, რითაც შეასრულა თავისი დიდი ხნის დაპირება აღნიშნული სამთავრობო უწყების შესახებ, რომელიც, მისი თქმით, ხელს უწყობს "მემარცხენე" იდეოლოგიას.
