უნგრეთი აგრძელებს ევროპის მშვიდობის ფონდიდან უკრაინის მხარდასაჭერად თანხების გამოყოფისა და უკრაინის ევროკავშირში გაწევრიანებაზე მოლაპარაკებების პროცესის დაბლოკვას.
ამის შესახებ პოლონეთის საგარეო საქმეთა მინისტრმა რადოსლავ სიკორსკიმ ლუქსემბურგში ევროკავშირის საგარეო საქმეთა მინისტრების შეხვედრის შემდეგ ჟურნალისტებთან საუბრისას განაცხადა.
მისი თქმით, ოფიციალური ბუდაპეშტი ბლოკავს სანქციების მე-17 პაკეტს და უკრაინის ბლოკში გაწევრიანებაზე მოლაპარაკებებთან დაკავშირებით პირველი კლასტერის გახსნას.
„არსებობს ერთი ქვეყანა - უნგრეთი - რომელსაც არ აქვს მორალური სიცხადე, რაც ჩვენ გვაქვს იმ თავდასხმების მიმართ, რომელსაც პუტინი ახორციელებს. მე კიდევ ერთხელ მოვუწოდე უნგრეთს, მოხსნას ვეტო თანხების გამოყოფაზე და შეწყვიტოს მოლაპარაკებების პროცესის დაბლოკვა. მაგრამ ეს კედელთან ლაპარაკს ჰგავს“, - აღნიშნა პოლონელმა მინისტრმა.
უნგრეთის საგარეო საქმეთა მინისტრმა პიტერ სიიარტომ 14 აპრილს განაცხადა, რომ უნგრეთი ეწინააღმდეგება უკრაინის ტერიტორიაზე ევროკავშირის სამხედრო სასწავლო მისიების ჩატარებას.
უფრო მეტიც, ისინი მხარს არ უჭერენ სანქციებს რუსეთიდან ენერგოიმპორტის წინააღმდეგ.
მანამდე უნგრეთის პრემიერ-მინისტრმა ვიქტორ ორბანმა განაცხადა, რომ უკრაინის ევროკავშირში გაწევრიანება უნგრეთს გაანადგურებს.
მისი თქმით, უნგრეთი უნდა შეეწინააღმდეგოს უკრაინის პოლიტიკურ ბლოკში გაწევრიანებას.
„ჩვენ უნდა ვიბრძოლოთ იმისთვის, რომ ვერავინ შეაფერხოს ჩვენი ეკონომიკური მიღწევები, რათა აგრო-ინდუსტრიული რისკები არ შეგვექმნას, რათა უნგრელებს არ შეექმნათ წესრიგისა და უსაფრთხოების მრავალი გამოწვევა, რაც აუცილებლად მოჰყვება უკრაინის ევროკავშირში გაწევრიანებას“, - განაცხადა ორბანმა.
