ბიზნესომბუდსმენის თანამდებობაზე ბიზნესი მხარს გიორგი პერტაიას კანდიდატურას უჭერს. როგორც ბიზნესასოციაციის წარმომადგენლებმა პრემიერ-მინისტრ ნიკოლოზ გილურთან შეხვედრის დაწყებამდე განაცხადეს, ისინი ამ ხნის განმავლობაში ნაყოფიერად მუშაობდნენ პრემიერის მრჩეველ გიორგი პერტაიასთან, რომელიც წინასწარ იყო დაანონსებული, რომ ბიზნესომბუდსმენი გახდებოდა. შესაბამისად, მათი მუშაობა პერტაიასთან "აწყობილია".
ბიზნესასოციაციის ვიცე-პრეზიდენტ გიორგი ისაკაძის განმარტებით, ბიზნესომბუდსმენის თანამდებობის შემოსვლა მნიშვნელოვანი ხიდია სახელმწიფოსა და კერძო სექტორს შორის.
"ბიზნესომბუდსმენის ინსიტუტს განვიხილავთ დამატებით ხიდს ქვეყნის ხელისუფლებასთან ურთიერთობაში და რაც მნიშვნელოვანია, ეს კანონით არის გამყარებული. ბოლო თვეების განმავლობაში აქტიურად ვთანამშრომლობდით პერტაიასთან, რომელიც დღემდე არებული კანონმდებლობიდან გამომდინარე ბიზნესომბუდსმენი ვერ იქნებოდა, თუცა ამ მიმართულებით მასთან აქტიურად ვთანამშრომლობდით და ეს თანამშრომლობა საკმაოდ ნაყოფიერი იყო", - განაცხადა ისაკაძემ.
ამერიკის სავაჭრო პალატის პრეზიდენტი დევიდ ლიი კი მიიჩნევს, რომ ბიზნესომბუდსმენის თანამდებობაზე პერტაიას კანდიდატურა მისაღებია, რადგან ის საკმაოდ გამოცდილი კანდიდატია.
როგორც ლიიმ განაცხადა, ბიზნესომბუდსმენთან ურთიერთობა კერძო სეტორისთვის მნიშვნელოვანია, რადგან მასთან ურთიერთობისას მნიშვნელოვანი საკითხები შეიძლება გადაწყდეს.
ბიზნესასოციაციის პრეზიდენტი გიორგი ჭირაქაძე აცხადებს, რომ ის კანდიდატურები, რომებიც ამ დროისთვის ბიზნესომბუდსმენის თანამდებობაზე განიხილება, საკმაოდ სწორად არის შერჩეული.
"ბიზნესომბუდსმენის პოსტის არსებობა ძალიან მნიშვნელოვანია, რათა მთავრობამ და ბიზნესმა პრობლემების მოგვარება შეძლოს", - განაცხადა ჭირაქაძემ.
პრემიერ-მინისტრისა და ბიზნესგაერთიანებების შეხვედრა სახელმწიფო კანცელარიაში ამ წუთებში დაიწყო და მასზე ბიზნესომბუდსმენის უფლებამოსილების გაძლიერების საკითხი განიხილება.
შეგახსენებთ, რომ აღნიშნულ თანამდებობაზე მთავრობა სამ კანდიდატურას - ჯემალ ინაიშვილს, გიორგი პერტაიასა, ირაკლი ეზუგბაიას - განიხილავს.