არსებული ინფორმაციით, "ქართული ოცნების" დეპუტატებისთვის 9 აპრილის სპეციალური სივრცე, პარლამენტის ეზოში მოეწყო
გავრცელდა კადრები, სადაც ჩანს, როგორ ტოვებს საკანონმდებლო ორგანოს შიდა ტერიტორიას რამდენიმე მანქანა. "ოცნების" დეპუტატებმა, სავარაუდოდ გადაიფიქრეს 9 აპრილის მემორიალთან მისვლა. მედიის ინფორმაციით, მათ სპეციალური სივრცე ეზოში მოაწყვეს, დადეს მაგიდა და ტიტები მიიტანეს.
ამ დროისათვის სინდისის პატიმრების ოჯახის წევრები და სხვა მოქალაქეები 9 აპრილის მემორიალთან რჩებიან.
მოქალაქეების ნაწილმა ღამე პარლამენტთან გაათენა. ისინი ამ დრომდე ადგილზე რჩებიან. მათ სიმბოლურად დილის 4:00 საათზე 9 აპრილს დაღუპულთა სულებისთვის ილოცეს და ფიცი დადეს.
9 აპრილის მემორიალთან პერიოდულად ვითარება იძაბება. ადგილზე შეკრებილი აქციის მონაწილეები შეძახილებით დახვდნენ „ქართული ოცნებიდან“ გლდანის მაჟორიტარ დეპუტატს კონსტანტინე ზარნაძეს. დეპუტატს შეკრებილმა საშუალება არ მისცეს, ყვავილებით შეემკო მემორიალი.
ამასთან, რამდენჯერმე მოხდა დაპირისპირება აქციის მონაწილეებსა და იმ პირებს შორის, რომლებსაც სურდათ, მემორილათან მისვლა.
ადგილზე მობილიზებული არიან შინაგან საქმეთა სამინისტროს წარმომადგენლები.
კადრი - ტვ.პირველი
