მალტის პარლამენტის თავმჯდომარემ აღნიშნა, რომ ქართველმა ხალხმა საკუთარი პოლიტიკური დღის წესრიგი თავად უნდა განსაზღვროს, მალტის ხელისუფლების მხრიდან სრული მხარდაჭერა გვაქვს, – ამის შესახებ პარლამენტის თავმჯდომარემ, შალვა პაპუაშვილმა მალტის პარლამენტის თავმჯდომარესთან, ანჟელო ფარუჯასთან შეხვედრისას განაცხადა.
„მალტის პარლამენტის თავმჯდომარესთან ძალიან გულწრფელი შეხვედრა მქონდა. რა თქმა უნდა, საუბარი იყო არსებულ გარემოზე, უსაფრთხოებასა და ეკონომიკაზე, განსაკუთრებით ევროპაში. ამ მხრივ, მალტას აქვს კონკრეტული შედეგები, რაც ეკონომიკურ განვითარებას ეხება. ჩვენც ვისაუბრეთ თუ რამდენად წარმატებულად მიმდინარეობს ჩვენთან ეკონომიკური წინსვლის პროცესი. კონტინენტზე ლიდერი ვართ, პირველ ადგილზე ვართ ეკონომიკური ზრდის ტემპებით და ჩვენი ხელისუფლებისთვის ეს მთავარი საკითხია. რა თქმა უნდა, ასევე ვისაუბრეთ, საქართველოსა და ევროკავშირს შორის ურთიერთობებზე. მალტის პარლამენტის თავმჯდომარემ ხაზი გაუსვა საქართველოს სუვერენიტეტის პატივისცემას და იმ საკითხს, რომ ქართველმა ხალხმა თავისი პოლიტიკური დღის წესრიგი თავად უნდა განსაზღვროს. ამ მხრივ, მალტის ხელისუფლების მხრიდან სრული მხარდაჭერა გვაქვს. მიხარია, რომ პარლამენტებს შორის კარგი ურთიერთობაა. ასევე ჩემი პირადი ურთიერთობა მალტის პარლამენტის თავმჯდომარესთან მეგობრულია და ურთიერთპატივისცემაზეა დამყარებული. ამ მხრივ, მალტას საქართველოს მიმართ განსაკუთრებული დამოკიდებულება აქვს“, – პირველი არხის ცნობით, განაცხადა პაპუაშვილმა.
