საქართველოს მთავრობა მოლაპარაკებებს აწარმოებს კომპანია "რენოსთან", რათა ის ავტომობილები რომელსაც საქართველო ამ კომპანიისგან შეიძენს საქართველოში აეწყოს.
ეკონომიკისა და მდგრადი განვითარების მინისტრის ვერა ქობალიას განმარტებით, საქართველოს მთავრობა ამუშავებს 5 წლიან პროგრამას, რომლის მიხედვითაც საქართველოს მთავრობის მიერ შეძენილი ავტომობილები საქართველოში აეწყობა.
"ჩვენ ბევრად უფრო იაფი დაგვიჯდება, რომ გამოვიყენოთ ელექტრომანქანები, ვიდრე ჩვეულებრივი სტანდარტული ავტომობილები. ჩვენ გვინდა, რომ უფრო მეტი სამუშაო ადგილი შევქმნათ და ამიტომ მოლაპარაკებებს ვაწარმოებთ "რენოსთან" და სხვა კომპანიებთან. მათ ვთავაზობთ იმას, რომ ჩვენს მიერ შეძენილი ავტომობილები საქართველოში აეწყოს. მთავრობა ამ დროისათვის 5 წლიან პროგრამაზე მუშაობს. უკვე მიმდინარეობს დაწერა პროექტისა "მწვანე საქართველო", რომლის მიხედვითაც ქვეყანაში ელექტრომობილების შემოტანა მოხდება", - განაცხადა ვერა ქობალიამ.
ეკონომიკისა და მდგრადი განვითარების მინისტრის ვერა ქობალიას განცხადებით საქართველოს მთავრობა 2011 წელს ათასამდე ელექტრომობილის შეძენას გეგმავს.
უკვე ცნობილია, რომ ავტომობილების შესყიდვა მოხდება ერთიანად და არა ცალკეული სამინისტროების მიერ.
