საქართველოში ბოლივუდური ფილმის გადაღებისთვის საჭირო გარემოს შესასწავლად ინდური საპროდიუსერო კომპანიის წარმომადგენლები ჩამოდიან.
ბოლივუდის პროდიუსერების ოფიციალური ვიზიტი საქართველოში ხვალ, 27 იანვარს, შედგება.
"ჯი-ეიჩ-ენის" ინფორმაციით, საქართველოში ჩამოდიან ნარენდრა ბაჯაჯი - "სიდჰი ვინაიაკ ქრიეშენზი", ვარუნ ბაჯაჯი - თანაპროდიუსერი, ჩირაგ ბაჯაჯი - აღმასრულებელი პროდიუსერი, როოპ ნაიკი - "ზიპ პაპ ზუმ პროდაქშენი", ლელა სოფოვეი - შეთავაზებული კოორდინატორი (ქართულ-ინდური ბიზნესი).
ბოლივუდის დელეგაცია შეხვედრებს გამართავს ასევე სამთავრობო წრეების წარმომადგენლებთანაც.
პროგრამის თანახმად, ბოლივუდის დელაგაცია შეხვედრებს გამართავს ეკონომიკისა და მდგრადი განვითარების მინისტრთან ვერა ქობალიასთან,
კულტურისა და ძეგლთა დაცვის მინისტრთან ნიკოლოზ რურუასთან.
დელეგაცია შეხვედრას გამართავს, ასევე, სს `ქართული კინოს~ წარმომადგენელთან არჩილ მენაღარიშვილთან. იმავდროულად დაგეგმილია ქართული ფილმის `ჩემი ბებია"-ს პრეზენტაცია (ქართული ფილმის ცენტრი).
"ბოლივუდში ბოლო დროს ძალიან პოპულარული გახდა ფილმების სხვადასხვა ქვეყნებში გადაღება. ამით ჩვენც დავინტერესდით და დავუკავშირდით ყველაზე დიდ საპროდიუსერო კომპანიებს, რომლებიც ბოლივუდური ფილმების გადაღებაზე მუშაობენ", - განაცხადა ორი თვის წინ ვერა ქობალიამ.
მისივე განმარტებით, ბოლივუდური ფილმის საქართველოში გადაღება ტურიზმის განვითარებას და ახალი სამუშაო ადგილების შექმნას შეუწყობს ხელს, რადგან ასეთ შემთხვევაში ქვეყანაში ფილმზე მომუშავე რამდენიმე ათას პირს მოუწევს ჩამოსვლა.
კულტურისა და ძეგლთა დაცვის მინისტრ ნიკოლოზ რურუას ბოლივუდური ფილმის საქართველოში გადაღება "სავსებით რეალურად" მიაჩნია.
"ჩვენი ლანდშაფტი მრავალფეროვანი, ფილმის კეთებისთვის საჭირო პირობები კი იაფია, ამიტომაც ბოლივუდური ფილმის საქართველოში გადაღება სავსებით რეალურია", - განუცხადა რურუამ ჟურნალისტებს აღნიშნულ საკითხზე კომენტირებისას.
შეგახსენებთ, რომ 2010 წლის ოქტომბერში ქართული დელეგაციის ინდოეთში ვიზიტისას, ეკონომიკისა და მდგრადი განვითარების მინისტრი ვერა ქობალიას ინდური კინოს ცნობილ ვარსკვლავს, ამირხანს სახლში ესტუმრა. ამირხანმა საქართველოში ჩამოსვლისა და მისი მონაწილეობით ფილმის გადაღების მზადყოფნა გამოთქვა.
