დანიის პრემიერ-მინისტრმა მეტე ფრედერიქსენმა გრენლანდიაში ვიზიტისას აშშ-ის პრეზიდენტი დონალდ ტრამპი კიდევ ერთხელ გააკრიტიკა რეზონანსული განცხადებებისთვის კუნძულთან დაკავშირებით და შეახსენა, რომ ეს მიწა მის მოსახლეობას ეკუთვნის.
ფრედერიქსენმა თქვა, რომ მისი ვიზიტის დროს სურდა მკაფიო გზავნილი გაეგზავნა შეერთებულ შტატებისთვის.
„აშშ-მა ხელში არ უნდა დაიპყროს გრენლანდია. გრენლანდია ეკუთვნის გრენლანდიელებს და შეერთებულმა შტატებმა არ უნდა დაიპყროს გრენლანდია. და რა თქმა უნდა, ეს არის გზავნილი, რომელზეც ჩვენ ყველა ერთად ვისაუბრებთ მომდევნო რამდენიმე დღის განმავლობაში“, - განაცხადა დანიის პრემიერმა.
მისი თქმით, ვიზიტის დროს განიხილება საგარეო პოლიტიკისა და უსაფრთხოების სფეროში არსებული ვითარება.
კითხვაზე გრენლანდიის ახლად არჩეული საგარეო საქმეთა მინისტრის ვივიან მოცფელდტის მიერ მისი ვიზიტის კრიტიკის შესახებ, ფრედერიკსენმა თქვა: „მე ვნახე ეს დისკუსია. და მინდა ყველას ვუთხრა გრენლანდიაში, რომ მე მხოლოდ ერთი სურვილი მაქვს – გავაკეთო ყველაფერი, რაც ჩემს ძალებშია, რომ მოვუარო ამ შესანიშნავ ქვეყანას. და ძალიან რთულ ვითარებაში გრენლანდიის მხარი დავუჭერო“, - განაცხადა ფრედერიქსენმა. მან დასძინა, რომ ახლა არის დრო, რომ იყვნენ ერთად ამ "ნამდვილად რთულ დროს, რომელსაც გრენლანდია გადის".
„და როცა გრენლანდია რთულ ვითარებაშია, დანიის სამეფოც და ევროპაც ასევე რთულ მდგომარეობაში არიან“, - დასძინა მან.
როგორც ცნობილია, გრენლანდიასთან დაკავშირებით შეერთებული შტატების განცხადებებს დანიის ხელისუფლების მხრიდან მკაცრი რეაგირება მოჰყვა.
