საქართველოს საავტომობილო ბაზარი მეზობელი ქვეყნებისთვის ხელსაყრელია. საერთაშორისო ტელეკომპანია "მირის" ინფორმაციით, სომხეთისა და აზერბაიჯანის მოქალააქები მეორად ავტომობილებს ძირითადად საქართველოში, კერძოდ რუსთავში მდებარე საავტომობილო ბაზარზე იძენენ.
ტელეკომპანიის ინფორმაციით, საქართველოში ავტომობილებზე ფასი ბევრად დაბალია, ვიდრე აზერბაიჯანსა და სომხეთში. მაგალითისთვის: თუ საქართველოში BMW მარკის ავტომობილის საშუალო ფასი 5 ათასი დოლარია, აზერბაიჯანში მისი ღირებულება თითქმის ორჯერ მეტია.
აზერბაიჯანის მოქალაქეები აცხადებენ, რომ საბაჟო პროცედურების გავლა საქართველოში ბევრად იაფია, ვიდრე აზერბაიჯანში. ავტომობილების განბაჟება საქართველოში ავტომობილის ღირებულების დაახლოებით 5 %-ს შეადგენს, მაშინ, როდესაც აზერბაიჯანში ავტომობილის ღირებულების 25 %-ია. უნდა აღინიშნოს, რომ სომხეთისა და აზერბაიჯანის მოქალაქეები კმაყოფილნი არიან საქართველოში არსებული სერვისით, სადაც ავტომობილის რეგისტრაცია და სანომრე ნიშნების აღება 15-20-წუთიან პროცედურაში ხდება, ხოლო მისი ღირებულება 40 დოლარის ეკვივალენტია.
იმავდროულად, ქართული მხარე აზერბაიჯანისა და სომხეთის მოქალაქეებს რეექსპორტისათვის სავალდებულო ყველა დოკუმენტით უზრუნველყოფს.