გრენლანდიის ახალმა პრემიერ-მინისტრმა იენს-ფრედერიკ ნილსენმა 30 მარტს განაცხადა, რომ გრენლანდია არ გახდება შეერთებული შტატების ნაწილი.
„[აშშ-ის პრეზიდენტმა დონალდ] ტრამპმა თქვა, რომ აშშ „მიიღებს გრენლანდიას“. ნება მომეცით მკაფიოდ განვაცხადო: შეერთებული შტატები გრენლანდიას ვერ მიიღებს. ჩვენ არ ვეკუთვნით სხვა ვინმეს. ჩვენ თვითონ განვსაზღვრავთ ჩვენს მომავალს“, - წერს ნილსენი სოციალურ ქსელში.
ნილსენმა ასევე მოუწოდა გრენლანდიის მოსახლეობას, არ შეეშინდეთ აშშ-ის პრეზიდენტის განცხადებების და უპასუხონ მათ „ღირსეულად და ერთიანობით“.
შეგახსენებთ, აშშ-ის პრეზიდენტმა დონალდ ტრამპმა NBC News-თან ინტერვიუში განაცხადა: "ჩვენ მივიღებთ გრენლანდიას. დიახ, 100%-ით".
