ფინეთის პრეზიდენტმა ალექსანდრ სტუბმა აშშ-ის პრეზიდენტ დონალდ ტრამპთან შვიდსაათიანი შეხვედრის შემდეგ განაცხადა, რომ შეერთებული შტატები ამუშავებს სანქციებს რუსეთის წინააღმდეგ იმ შემთხვევაში, თუ იგი უარს იტყვის უკრაინაში ცეცხლის შეწყვეტაზე ან დაარღვეევს მას.
სტუბმა აღნიშნა, რომ ფინეთი 20 აპრილს მიიჩნევს კარგ თარიღად ყოველგვარი პირობის გარეშე ცეცხლის სრული შეწყვეტის დასაწყებად.
"რატომ 20 აპრილი? იმიტომ, რომ ჩვენ გვჭირდება ვადა. იმიტომ რომ აღდგომაა. და იმიტომ, რომ პრეზიდენტი ტრამპის თნამდებობაზე ყოფნის სამი თვეიქნება", - განმარტა ფინეთის პრეზიდენტმა.
სტუბის თქმით, თუ რუსეთი არ დათანხმდება ცეცხლის შეწყვეტას ან დაარღვევს მას, საჭირო იქნება სანქციების ძლიერი მექანიზმის შემოღება. მისივე თქმით, მსგავსი სანქციები აშშ-შიც მზადდება.
„ჩვენ ასევე განვიხილეთ ეს პრეზიდენტ ტრამპთან და სენატორ ლინდსი გრემთან, სანქციების პაკეტის არქიტექტორთან. და უახლოეს მომავალში ის შესთავაზებს ამას შეერთებული შტატების ორმოცდაათი სენატორის მხარდაჭერით“, - განაცხადა ფინეთის პრეზიდენტმა.
ლინდსი გრემი ასევე იმყოფებოდა შეხვედრაზე ფლორიდაში, სადაც სტუბი და ტრამპი სხვადასხვა საკითხის განხილვასთან ერთად გოლფს თამაშობდნენ.
პრესკონფერენციაზე სტუბს ჰკითხეს კონკრეტულად რას ფიქრობს ტრამპი ამ სანქციებზე.
„გრემსა და პრეზიდენტ ტრამპს ახლო ურთიერთობა აქვთ. რა თქმა უნდა, ყველაფერი, რასაც სენატორი გრემი გეგმავს, არ შესრულდება.
მაგრამ ისეთი შთაბეჭდილება მრჩება, რომ მოთმინება იწურება აშშ-ს მხარესაც - და ეს, ჩემი აზრით, კარგია“, - თქვა ფინეთის პრეზიდენტმა.
სტუბის თქმით, ტრამპის მოთმინებაც იწურება.
„ის ძალიან მოუთმენელია რუსეთის ქმედებებთან დაკავშირებით, ამ შეთქმულებით და ცეცხლის შეწყვეტის შეფერხებით. შევეცადე ამეხსნა, რომ ეს სრულიად ნორმალური საქციელია რუსეთისთვის.
ჯერ რაღაცაზე შეთანხმდები და მერე ისევ პირობებს წამოაყენებ“, - აღნიშნა მან.
სტუბის თქმით, სენატორ გრემის განცხადებების თვალი უნდა ადევნონ მომდევნო რამდენიმე დღის განმავლობაში.
„მე ვნახე ზოგიერთი მათგანი [სანქციები] და თუ ის განხორციელდება, ეს ძალიან დიდ გავლენას მოახდენს“, - აღნიშნა ფინეთის პრეზიდენტმა. სტუბმა აღნიშნა, რომ მან ტრამპს უთხრა, რომ რუსეთს მხოლოდ ძალის ესმის. და ეს ნიშნავს სანქციებს და გაყინული რუსული სახსრების გამოყენებას უკრაინის მხარდასაჭერად.
