უკრაინის პრეზიდენტი ვოლოდიმირ ზელენსკი მოუწოდებს პარტნიორებს სერიოზული რეაგირება მოახდინონ რუსეთის მუდმივ დაბომბვაზე, რომელიც ძირს უთხრის საერთაშორისო ძალისხმევას ომის დასრულებისთვის. ამის შესაზებ ზელენსკიმ ვიდეომიმართვისას ისაუბრა.
„წუხელ 172 მოიერიშე დრონი იყო, მათგან ასზე მეტი იყო „შაჰედი“. ფაქტობრივად, ყოველ დღე ხდება ასეთი მასშტაბური დარტყმები, სარაკეტო საფრთხეები, ბალისტიკა.
ჩვენმა პარტნიორებმა უნდა გაიგონ, რომ რუსეთის ეს დარტყმები ურტყამს არა მხოლოდ ჩვენს ხალხს, არამედ ყველა საერთაშორისო ძალისხმევას, დიპლომატიას, რომლითაც ჩვენ ვცდილობთ დავასრულოთ ეს ომი. რუსეთი ურტყამს ყველა იმ პოზიციებს, ვისაც ომის დასრულება სურს. შეუძლებელია ყოველ ღამე ასობით „შაჰედის“ უგულებელყოფა. ველოდებით სერიოზულ რეაქციას. ჩვენ ვმუშაობთ რეაქციაზე. ძალიან საჭიროა ძლიერი რეაქცია უპირველეს ყოვლისა ამერიკის, ევროპის და მსოფლიოში ყველასი, ვინც ფსონი დადო დიპლომატიაზე. რუსეთს მშვიდობა უნდა აიძულო და და მხოლოდ იძულება იმუშავებს. ამერიკის წინადადება ცეცხლის უპირობო შეწყვეტის შესახებ უკვე დიდი ხანია მაგიდაზე დევს, რუსეთისგან ადეკვატური პასუხის გარეშე. ეს ბევრ რამეზე მეტყველებს. უკვე შეიძლებოდა ცეცხლის შეწყვეტა, თუ რუსეთზე რეალური ზეწოლა იქნებოდა“, - განაცხადა ზელენსკიმ.
ზელენსკიმ მადლობა გადაუხადა პარტნიორებს, რომლებიც ხელს უწყობენ ახალი სანქციების გადაწყვეტილებებს რუსეთის ფედერაციის წინააღმდეგ.
მან ასევე განაცხადა, რომ ესაუბრა უკრაინის შეიარაღებული ძალების მთავარსარდალ ოლექსანდრ სირსკის ფრონტზე არსებული ვითარების შესახებ, ასევე რუსეთის ტერიტორიის იმ რაიონებზე, სადაც უკრაინული ძალები მოქმედებენ.
„ჩვენ ვინარჩუნებთ აქტივობას, რომელიც ხელს უშლის ოკუპანტის შესვლას სუმის რეგიონში, ისევე როგორც ხარკოვის რეგიონში. მადლობას ვუხდი ყველა ჩვენს ქვედანაყოფს სიმტკიცისთვის - ყველა მათგანს, კურსკის რაიონიდან სამხრეთის მიმართულებით“, - განაცხადა უკრაინის პრეზიდენტმა.
