რუსეთისა და ამერიკის დელეგაციებმა დაასრულეს მოლაპარაკებები, რომლებიც საუდის არაბეთის დედაქალაქ ერ-რიადში მიმდინარეობდა და უკრაინაში რუსეთის შეჭრის დასრულებას ეხებოდა.
რუსული მედიის ცნობით, შეხვედრა რუსეთსა და აშშ-ს შორის შესვენებებით 12 საათს გაგრძელდა. მისი შედეგების მიხედვით, ერთობლივი განცხადება 25 მარტს გაკეთდება.
გავრცელებული ინფორმაციით, შეხვედრა დახურულ კარს მიღმა სასტუმრო Ritz-Carlton-ში გაიმართა.
რუსეთს წარმოადგენდნენ ფედერაციის საბჭოს საერთაშორისო კომიტეტის ხელმძღვანელი გრიგორი კარასინი და ეფ-ეს-ბეს დირექტორის მრჩეველი სერგეი ბესედა.
კრემლმა ადრე განაცხადა, რომ საუდის არაბეთში ამერიკულ დელეგაციასთან დისკუსიის ფოკუსი იყო შავი ზღვის მარცვლეულის ინიციატივის განახლების საკითხი, რომელიც რუსებმა 2023 წელს დატოვეს.
მანამდე, 23 მარტს, ერ-რიადში ამერიკისა და უკრაინის დელეგაციების შეხვედრა გაიმართა.
უკრაინის საგარეო საქმეთა სამინისტრომ განაცხადა, რომ ამ შეხვედრაზე უნდა განისაზღვროს წინადადებების პარამეტრები ცეცხლის შეწყვეტის სხვადასხვა რეჟიმის შესახებ, რომლებიც დღეს მაგიდაზეა.
უკრაინის პრეზიდენტის ვოლოდიმირ ზელენსკის განცხადებით, ამერიკელებსა და რუსებს შორის მოლაპარაკებების დასრულების შემდეგ, უკრაინის დელეგაცია შემდგომ მოლაპარაკებებს გამართავს აშშ-ს დელეგაციასთან.
