აშშ-ის პრეზიდენტის დონალდ ტრამპის სპეციალურმა წარმომადგენელმა სტივ უიტკოფმა განაცხადა, რომ უკრაინა ჯერ კიდევ ვერ გაწევრიანდება ნატო-ში რუსეთისა და აშშ-ს პოზიციის გამო, მაგრამ ჩრდილო ატლანტიკური ხელშეკრულების მე-5 მუხლით მისთვის უსაფრთხოების გარანტიების უზრუნველყოფის საკითხზე დისკუსია შესაძლებელია.
უიტკოფმა აღნიშნა, რომ უკრაინის პრეზიდენტმა ვოლოდიმირ ზელენსკიმ და პრეზიდენტის აპარატის ხელმძღვანელმა ანდრიი ერმაკმა ფაქტობრივად აღიარეს უახლოეს მომავალში უკრაინის ნატო-ში გაწევრიანების შეუძლებლობა.
„ვფიქრობ, ზელენსკიმ და მისმა მარჯვენა ხელმა ერმაკმა, დიდწილად აღიარეს, რომ ნატო-ს წევრები არ იქნებიან“, - თქვა უიტკოფმა.
ამავდროულად, მან აღნიშნა, რომ მიმდინარეობს დისკუსიები უკრაინაში კოლექტიური თავდაცვის პრინციპის შესაძლო გავრცელებასთან დაკავშირებით, როგორც ეს გათვალისწინებულია ალიანსის ხელშეკრულების მე-5 მუხლით.
მისი თქმით, დისკუსიის საგანი რჩება უკრაინის შეერთებული შტატების ან ევროპის ქვეყნებისგან ასეთი დაცვის უზრუნველყოფის საკითხი.
„შეიძლება თუ არა უკრაინას ჰქონდეს ეს გარკვეული კუთხით შეერთებული შტატებიდან ან ევროპის ქვეყნებიდან ნატო-ს წევრობის გარეშე. და მე ვფიქრობ, რომ ეს არის ღია [საკითხი] დისკუსიისთვის."
