2012 წელს საქართველო მსოფლიო ტურიზმის ორგანიზაციის ევროპის რეგიონული კომისიის 54-ე შეხვედრას უმასპინძლებს.
ესპანეთში ვიზიტის დროს საქართველოს ეკონომიკისა და მდგრადი განვითარების მინისტრის პირველი მოადგილე არჩილ კეკელია მსოფლიო ტურიზმის ორგანიზაციის გენერალურ მდივანს ტალებ რიფაის შეხვდა. შეხვედრაზე ცნობილი გახდა, რომ მსოფლიო ტურიზმის ორგანიზაციის ევროპის რეგიონული კომისიის 54-ე შეხვედრა და რეგიონული ფორუმი საქართველოში გაიმართება. ეს იქნება ერთ- ერთი ყველაზე მასშტაბური ღონისძიება, რომელსაც ევროპის ქვეყნების წარმომადგენლები დაესწრებიან. აღნიშნული შეხვედრა ხელს შეუწყობს საქართველოს, როგორც ტურისტული ქვეყნის პოპულარიზაციას.
მსოფლიო ტურიზმის ორგანიზაციის გენერალურმა მდივანმა ხაზგასმით აღნიშნა, რომ საქართველო ასრულებს სტრატეგიულ როლს სამხრეთ კავკასიაში და ამ ორგანიზაციის ერთ-ერთი პრიორიტეტული მიმართულება სწორედ სამხრეთ კავკასიაში ერთიანი ტურისტული პროდუქტების დანერგვა იქნება. ტალებ რიფაიმ ხაზი გაუსვა ასევე საქართველოს მონაწილეობას აბრეშუმის გზის განხორციელებაში, რაც ქვეყანას საშუალებას მისცემს ჩაერთოს აბრეშუმის გზის ერთიან ტურისტულ მარშრუტში.
მინისტრის მოადგილისა და ტურიზმის ორგანიზაციის გენერალურ მდივნის შეხვედრისას საუბარი შეეხო ასევე საქართველოში ტურისტული ინფრასტრუქტურის განვითარებას, რაც ტალებ რიფაის განცხადებით, დაჩქარებული ტემპით მიმდინარეობს. მსოფლიო ტურიზმის ორგანიზაციის გენერალურმა მდივანმა, რომელიც უკვე კარგად იცნობს საქართველოს ტურისტულ პოტენციალს, დადებითად შეაფასა ანაკლიისა და ქობულეთის თავისუფალი ტურისტული ზონების შექმნა.
კეკელიამ ტალებ რიფაისგან მნიშვნელოვანი რეკომენდაციები და მხარდაჭერა მიიღო. მსოფლიო ტურიზმის ორგანიზაციის გენერალურმა მდივანმა გამოთქვა ინიციატივა, რომ ქართველმა ახალგაზრდებმა სტაჟირება ამ ორგანიზაციაში გაიარონ.