ჩინეთმა ბოლო კვირების განმავლობაში სიკვდილით დასაჯა კანადის 4 მოქალაქე, მიუხედავად კანადის მთავრობის მიერ შეწყალების თხოვნისა. განაცხადა კანადის საგარეო საქმეთა მინისტრმა მელანი ჯოლიმ.
"ჩვენ მკაცრად ვგმობთ კანადელების სიკვდილით დასჯას ჩინეთში", - თქვა მინისტრმა.
მისი თქმით, მან და კანადის ყოფილმა პრემიერ-მინისტრმა ჯასტინ ტრუდომ პირადად თხოვეს ჩინეთის მთავრობას მსჯავრდებულთა შეწყალება.
"მე პირადად ვთხოვე შეწყალება... ისინი ორმაგი მოქალაქეები იყვნენ".
მან თქვა, არ შეუძლია მეტი დეტალის გამხელა, რადგან სიკვდილით დასჯილთა ოჯახებმა კონფიდენციალურობის დაცვა მოითხოვეს.
კანადელთა სიკვდილით დასჯასთან დაკავშირებით, ჩინეთის მთავრობამ განცხადება გამოაქვეყნა კანადურ მედიაში.
განცხადებაში აღნიშნულია, რომ კანადის მოქალაქეები დამნაშავედ ცნეს ნარკოდანაშაულში.
"ნარკომანიასთან დაკავშირებული დანაშაული არის მძიმე დანაშაული, რომელიც აღიარებულია მთელ მსოფლიოში, როგორც საზოგადოებისთვის უკიდურესად საზიანო. ჩინეთი ინარჩუნებს „ნულოვანი ტოლერანტობის“ პოლიტიკას ნარკომანიის პრობლემის მიმართ.
კანადის მოქალაქეების მიერ დანაშაულების ჩადენა დადასტურებულია და მტკიცებულებები მყარი და საკმარისია", - ნათქვამია განცხადებაში.
ამასთან, ჩინეთმა მოუწოდა კანადას, "შეწყვიტოს უპასუხისმგებლო განცხადებების" გაკეთება.
