საქართველს პრეზიდენტი ინფლაციას ეკონომიკის მთავარ გამოწვევად ასახელებს და აცხადებს, რომ საქართელოში აღნიშნული პრობლემა მწვავედ დგას.
"ინფლაცია არის მთავარი ეკონომიკური გამოწვევა, რაც დღეს გვაქვს. ჩვენისთანა შემოსავლის მქონე ქვეყნისათვის ეს არის განსაკუთრებულად მწვავე. ჩვენი ხალხისთვის მთავარი თემა სამომხმარებლო კალათაში არის საჭმელი და ახლა ადგილი აქვს ყველაზე ცუდ ინფლაციას, რაც ბოლო წლებში მომხდარა", - განაცხადა სააკაშვილმა ტელეკომპანია "პირველი საინფორმაციო კავკასიურის" პირდაპირ ეთერში ერთ-ერთი მოქალაქის შეკითხვაზე პასუხის გაცემისას.
მისი განმარტებით, საქართველოს მთავრობა, ისე როგორც ნებისმიერი სხვა ქვეყნის მთავრობა, ინფლაციის შეჩერების ბერკეტებს არ ფლობს.
"პირდაპირ მინდა ვთქვა, რომ მთავრობა არ ფლობს ამ სახის ინფლაციის შეჩერების ბერკეტებს. 90-იან წლებში გვქონდა სხვა სახის ინფლაცია. იყო კუპონები, რომელმაც გააუფასურა რუბლი, მერე მოხდა ლარების შემოტანა, ეროვნული ბანკი ბეჭდავდა ამ ვალუტას და ყველა ადამიანს ერთ დღეში ამოაცალეს ყველაფერი _ ასეთი ინფლაცია იყო. ახლა გვაქვს მკაცრი მონეტარული პოლიტიკა. არაფერი ისეთი არ ხდება საქართველოში, რაც ამას გამოიწვევდა. ამიტომ ჩამოშლა და ჰიპერინფლაცია საქართველოში ვერ მოხდება", - განმარტა სააკაშვილმა.