ჩეხეთის საგარეო საქმეთა მინისტრმა იან ლიპავსკიმ 17 მარტს ევროპელ კოლეგებთან შეხვედრაზე ევროკავშირს შესთავაზა "რადიო თავისუფლების" შეძენა, რომელსაც დონალდ ტრამპის ადმინისტრაციამ დაფინანსება შეუწყვიტა.
ლიპავსკიმ თქვა, რომ მან „რადიო თავისუფლების“ შესახებ საკითხი ევროკავშირის საგარეო საქმეთა საბჭოს შეხვედრაზე დააყენა, რათა ენახა, ხედავენ თუ არა „ჩვენი პარტნიორები ღირებულებას მისი მუშაობის გაგრძელებაში“.
„თუ ჩვენ „რადიო თავისუფლებში“ ღირებულებას ვხედავთ და, რა თქმა უნდა, ვხედავთ, მაშინ აქვს აზრი, განვიხილოთ მისი მომავლის უზრუნველყოფის გზები, მათ შორის მისი შესყიდვის შესაძლებლობა“, – განაცხადა ჩეხეთის საგარეო საქმეთა მინისტრმა.
მანამდე საგარეო პოლიტიკისა და უსაფრთხოების საკითხებში ევროკავშირის უმაღლესმა წარმომადგენელმა, კაია კალასმა განაცხადა, რომ "რადიო თავისუფლებისთვის" შეწყვეტილი აშშ-ის დაფინანსების ჩანაცვლება ევროკავშირს ავტომატურად არ შეუძლია, მაგრამ "საგარეო საქმეთა მინისტრებისგან რეალური ბიძგი იყო", რომ ეს განიხილონ და გზა მონახონ.
მისი თქმით, აღნიშნული საკითხი განიხილებოდა მინისტრების დღევანდელ შეხვედრაზე. მისივე თქმით, "ნახავენ, რისი გაკეთება შეუძლიათ".
