ბრიტანეთის პრემიერ-მინისტრმა კირ სტარმერმა გამოთქვა მზადყოფნა, განათავსოს ჯარები უკრაინაში მრავალწლიანი პერიოდის განმავლობაში, რათა მხარი დაუჭიროს პოტენციურ ცეცხლის შეწყვეტას რუსეთის მიერ გაჩაღებულ ომში და თავიდან იქნას აცილებული განმეორებითი შეჭრა. ამის შესახებ The Times წყაროზე დაყრდნობით იუწყება.
"ეს იქნება გრძელვადიანი ვალდებულება, ჩვენ ვსაუბრობთ წლებზე. რამდენიც სჭირდება სამშვიდობო შეთანხმების შენარჩუნებას და რუსეთის შეკავებას", - განუცხადა გამოცემას წყარომ.
თავდაცვის საქმეთა მინისტრები "მსურველთა კოალიციიდან" ხუთშაბათს ლონდონში შეხვდებიან, რათა განიხილონ "დიდი სპეციფიკით", თუ სად უნდა განთავსდეს ზუსტად სამშვიდობო ძალები.
ათამდე ქვეყანა, მათ შორის დიდი ბრიტანეთი, საფრანგეთი, თურქეთი, კანადა და ავსტრალია, განიხილავენ უკრაინაში 30 000-მდე ჯარისკაცის გაგზავნის გეგმებს. სხვა ქვეყნები მზად არიან დაეხმარონ იარაღისა და ლოჯისტიკის საკითხებში.
თუმცა, ჯერჯერობით უცნობია, მიიღებენ თუ არა უფლებას სამშვიდობო ძალები აგრესიის შემთხვევაში ცეცხლი გაუხსნან რუს ჯარისკაცებს.
როგორც გამოცემა აღნიშნავს, ეს საკითხიც სავარაუდოდ უახლოეს დღეებში განიხილება.
გეგმა ითვალისწინებს ცეცხლის შეწყვეტას „ჰაერსა და ზღვაში“, რათა შესაძლებელი იყოს რუსეთის ნებისმიერი პოტენციური დარღვევების მარტივი მონიტორინგი. ამას მოჰყვება ცეცხლის სრული შეწყვეტა, შემდეგ კი უცხოური კონტინგენტის შეყვანა.
