აფხაზ სეპარატისტთა ლიდერმა სერგეი ბაღაფშმა და სოხუმში მყოფმა როსსტატის ხელმძღვანელმა ალექსანდრე სურინოვმა აფხაზეთის მოსახლეობის აღწერის საკითხი განიხილეს, რომელიც მიმდინარე წლის თებერვალშია დაგეგმილი.
"აფხაზეთს წინ დიდი სამუშაო ელის. აღწერა რუსეთში შარშან ჩავატარეთ და ჩვენი გამოცდილება ჩვენი აფხაზი კოლეგებისთვის შესაძლოა საინტერესო იყოს. ჩვენი ვიზიტი სწორედ აფხაზეთში დაგეგმილ მოსახლეობის აღწერასთანაა დაკავშირებული", _ განაცხადა ალექსანდრე სურინოვმა ბაღაფშთან შეხვედრის დასრულების შემდეგ და დასძინა, რომ აფხაზეთი, მთლიანობაში, მოსახლეობის აღწერის ჩასატარებლად მზადაა.
აფხაზური მედია ასევე იუწყება, რომ აღწერის ჩასატარებლად აფხაზეთში უკვე შექმნილია 680 საანგარიშო და 152 საინსტრუქციო უბანი, ასევე 35 სააღწერო განყოფილება.
მოსახლეობის აღწერა სეპარატისტულ აფხაზეთში მიმდინარე წლის 21-28 თებერვალს ჩატარდება.
