ამერიკის ხელისუფლებამ ქვეყანაში კვერცხის სერიოზულ დეფიციტთან დაკავშირებით დახმარებისთვის ფინეთს მიმართა. თუმცა ფინეთის მთავრობის წარმომადგენლებმა უთხრეს, რომ ექსპორტი ამჟამად შეუძლებელია. ამის შესახებ გამოცემა Yle იუწყება.
ფინეთის მეფრინველეობის ასოციაციამ განაცხადა, რომ მას მიმართეს შეერთებულ შტატებში კვერცხის ექსპორტის შესახებ.
თუმცა, მისმა აღმასრულებელმა დირექტორმა ვეერა ლეჰტილიამ უპასუხა, რომ კვერცხის ექსპორტი ამჟამად შეუძლებელია, რადგან აშშ-ის ხელისუფლებასთან არ გამართულა შესაბამისი მოლაპარაკებები ამერიკის ბაზარზე შესვლის შესახებ.
„ექსპორტის დაწყება მარტივი ამოცანა არ არის, რადგან არ არსებობს შეთანხმებული წესები. ეს პროცესი შესაძლოა, იყოს ხანგრძლივი და ითვალისწინებს უამრავ კვლევას“, - აღნიშნა ლეჰტილამ.
მან განმარტა, რომ ექსპორტი რომც შესაძლებელი იყოს, ის მოითხოვს მნიშვნელოვან შემოწმებას და ბიუროკრატიულ პროცედურებს, რადგან ფინეთს არასოდეს მიუწოდებია კვერცხი შეერთებული შტატებისთვის და არ აქვს ოფიციალური ნებართვა კვერცხის ამ ქვეყანაში ექსპორტზე.
მეფრინველეობის ასოციაციის დირექტორმა ასევე ხაზგასმით აღნიშნა, რომ ექსპორტი რომც იყოს შესაძლებელი, ისინი ვერ მოაგვარებენ დეფიციტის პრობლემას აშშ-ში.
„ფრინველის გრიპის გამო იქ მილიონობით ფრინველი გაანადგურეს, ფინეთში კვერცხისმდებელი ქათმების საერთო რაოდენობა ოთხი მილიონია. ის მოცულობა, რომლის ექსპორტი შეგვეძლო, ვერ აანაზღაურებს მათი კვერცხის დეფიციტს“, - აღნიშნა მან.
გამოცემა ასევე დასძენს, რომ ანალოგიური თხოვნით, აშშ-მა დანიას, შვედეთსა და ნიდერლანდებსაც მიმართა.
თუმცა, შვედეთმა განაცხადა, რომ კვერცხის ექსპორტი აშშ-ში ნაკლებად სავარაუდოა სხვადასხვა შეზღუდვების გამო, ასევე კვერცხის დეფიციტი თავად ევროპაშიც არის.
აშშ-ს სოფლის მეურნეობის დეპარტამენტის მონაცემებით, მხოლოდ ამ წლის პირველ ორ თვეში ფრინველის გრიპის ეპიდემიის გამო 35 მილიონზე მეტი ფრინველი იქნა განადგურებული. ამ მხრივ აშშ-ში ქათმის კვერცხზე ფასები რეკორდულ დონეს აღწევს - თებერვალში კვერცხის ფასი 59%-ით გაიზარდა.
