აშშ-ის პრეზიდენტის სპეციალურმა წარმომადგენელმა სტივ უიტკოფმა განაცხადა, რომ დონალდ ტრამპსა და რუსეთის პრეზიდენტ ვლადიმირ პუტინს შორის სატელეფონო საუბარი შესაძლოა, უახლოეს დღეებში შედგეს.
CNN-თან ინტერვიუში უიტკოფმა თქვა, რომ პრეზიდენტები სავარაუდოდ 17-23 მარტს ისაუბრებენ.
„ვფიქრობ, ამ კვირაში ორ პრეზიდენტს ნამდვილად კარგი, პოზიტიური დისკუსია ექნება“, - თქვა უიტკოფმა.
უიტკოფი მოსკოვს 13 მარტს ეწვია, სადაც პირადად შეხვდა პუტინს. ტრამპის სპეციალური წარმომადგენლის თქმით, შეხვედრა 3-4 საათს გაგრძელდა და „პოზიტიური“ იყო. მისი თქმით, რუსული და ამერიკული მხარეები უფრო ახლოს არიან, ვიდრე აქამდე იყვნენ.
„ვფიქრობ, პუტინს სურს ეს ყველაფერი დასრულდეს,“ - თქვა უიტკოფმა.
უიტკოფმა ასევე თქვა, რომ ის მოელის, რომ უკრაინაში ცეცხლის შეწყვეტის შესახებ შეთანხმება უახლოეს კვირებში მიიღწევა.
თუმცა, მას არ დაუკონკრეტებია, თუ როგორ იგეგმება რუსეთის მიერ ანექსირებული უკრაინის ტერიტორიების საკითხის მოგვარება.
მანამდე აშშ-ის სახელმწიფო მდივანმა მარკო რუბიომ განაცხადა, რომ აშშ-მა უკრაინასთან ტერიტორიული დათმობები განიხილა.
ამასთან, უკრაინის ხელისუფლება კატეგორიულად უარყოფს რომელიმე ტერიტორიის დათმობის შესაძლებლობას.
