უკრაინის შეიარაღებული ძალების გენერალური შტაბი კურსკის ოლქში უკრაინული შენაერთების ალყაში მოქცევის შესახებ განცხადებებს უარყოფს. კერძოდ, ამის შესახებ მანამდე რუსეთის ლიდერმა ვლადიმირ პუტინმა და აშშ-ის პრეზიდენტმა დონალდ ტრამპმა ისაუბრეს.
„ცნობები, რომ თითქოს მტრის მიერ კურსკის ოლქში უკრაინული შენაერთები გარშემორტყმული არიან, არ შეესაბამება რეალობას და შექმნილია რუსების მიერ პოლიტიკური მიზნებისთვის და უკრაინასა და მის პარტნიორებზე ზეწოლის მიზნით.
ბოლო 24 საათის განმავლობაში ვითარება მნიშვნელოვნად არ შეცვლილა. „კურსკის“ სამხედრო დაჯგუფების ოპერატიული ზონაში საბრძოლო მოქმედებები გრძელდება“, - აღნიშნულია გენშტაბის ინფორმაციაში.
ინფორმაციაში ნათქვამია, რომ თავდაცვის ძალების ქვედანაყოფები გადაჯგუფდნენ და „გავიდნენ უფრო ხელსაყრელ თავდაცვით პოზიციებზე“.
„ჩვენი ჯარისკაცები იგერიებენ მოწინააღმდეგის თავდასხმას და ყველა სახის იარაღიდან აყენებენ მათ ეფექტურ ცეცხლს. მიმდინარე დღის დასაწყისიდან კურსკის მიმართულებით 13 სამხედრო შეტაკება მოხდა. ჩვენი ქვედანაყოფების ალყაში მოქცევის საფრთხე არ არსებობს“, - ნათქვამია განცხადებაში.
