შეერთებული შტატები გეგმავს გამოიყენოს უკრაინის დელეგაციასთან საუდის არაბეთში 11 მარტს დაგეგმილი შეხვედრა, რათა შეაფასოს რამდენად მზად არის კიევი დათმობებზე წავიდეს მოსკოვთან ომის დასასრულებალდ. ამის შესახებ Reuters ორ ამერიკელ ოფიციალურ პირზე დაყრდნობით იუწყება.
აშშ-ის სახელმწიფო მდივანი მარკო რუბიო ჯედაში ჩავა, სადაც უხელმძღვანელებს ამერიკულ დელეგაციას უკრაინელ ოფიციალურ პირებთან მოლაპარაკებებში.
მოლაპარაკებებს უკრაინიდან უკრაინის პრეზიდენტის აპარატის უფროსი ანდრიი ერმაკი გაუძღვება.
რუბიოს, შეუერთდებიან თეთრი სახლის ეროვნული უსაფრთხოების მრჩეველი მაიკ უოლცი და აშშ-ის პრეზიდენტის დონალდ ტრამპის სპეციალური წარმომადგენელი ახლო აღმოსავლეთში სტივ უიტკოფი.
„ამერიკელი ოფიციალური პირები აპირებენ გამოიყენონ უკრაინის დელეგაციასთან შეხვედრა ნაწილობრივ იმის გასარკვევად, მზად არის თუ არა უკრაინა მატერიალურ დათმობებზე წავიდეს რუსეთთან ომის დასრულების მიზნით“, - განაცხადეს წყაროებმა.
ამერიკული მხარე ასევე განიხილავს მოლაპარაკებებს, როგორც შესაძლებლობას შეაფასოს კიევის სურვილი, გააუმჯობესოს ურთიერთობები ტრამპის ადმინისტრაციასთან.
ეს საკითხი განსაკუთრებით აქტუალური გახდა მას შემდეგ, რაც აშშ-ისა და უკრაინის პრეზიდენტების წინა შეხვედრა გასულ თვეში დაპირისპირებით დასრულდა.
”არ შეგიძლიათ თქვათ ”მე მშვიდობა მინდა” და ”მე უარს ვამბობ კომპრომისზე”, - თქვა ერთ-ერთმა ამერიკელმა ოფიციალურმა პირმა, რომელიც კომენტარი გააკეთა მომავალ მოლაპარაკებებზე.
კიდევ ერთმა ოფიციალურმა პირმა ხაზი გაუსვა რეალისტური მოლოდინების მნიშვნელობას სამშვიდობო შეთანხმებისთვის: "ჩვენ გვინდა ვნახოთ, დაინტერესებულნი არიან თუ არა უკრაინელები არა მხოლოდ მშვიდობით, არამედ რეალისტური მშვიდობით. თუ ისინი დაინტერესებულნი არიან მხოლოდ 2014 ან 2022 წლის საზღვრებით, ეს რაღაცაზე მეტყველებს."
