აშშ-ის პრეზიდენტმა დონალდ ტრამპმა თავის თანაშემწეებს განუცხადა, რომ ვაშინგტონსა და კიევს შორის მინერალებზე შეთანხმება საკმარისი არ იქნება უკრაინისთვის დახმარების მიწოდებისა და დაზვერვის გაზიარების გასაგრძელებლად. ამის შესახებ NBC News წყაროებზე დაყრდნობით იუწყება.
ოფიციალური პირების თქმით, ტრამპს სურს შეთანხმების ხელმოწერა, მაგრამ მას ასევე სურს შეიცვალოს პრეზიდენტი ვოლოდიმირ ზელენსკის დამოკიდებულება სამშვიდობო მოლაპარაკებების მიმართ, მათ შორის წავიდეს ისეთ დათმობებზე, როგორიცაა ტერიტორიის დათმობა რუსეთისთვის.
ტრამპს ასევე სურს, რომ ზელენსკიმ გადადგას ნაბიჯები უკრაინაში არჩევნების ჩასატარებლად დ გადადგეს ქვეყნის ლიდერის პოსტიდან.
აშშ-ის ოფიციალური პირისა და ადმინისტრაციის ოფიციალური პირის თქმით, შეერთებულ შტატებს არ გააჩნია მტკიცებულება, რომ სადაზვერვო ინფორმაციების გაზიარების დაპაუზებამ პირდაპირი გავლენა მოახდინა რუსეთის თავდასხმებზე.
ორმა წყარომ გამოთქვა ოპტიმიზმი, რომ იარაღის, აღჭურვილობისა და სადაზვერვო ცნობების გაზიარება შესაძლოა, განახლდეს უკვე მომავალ კვირას, განსაკუთრებით მას შემდეგ, რაც ზელენსკიმ თქვა, რომ უკრაინა მზად არის რაც შეიძლება მალე დაჯდეს მოლაპარაკებების მაგიდასთან.
ოფიციალურმა პირებმა აღნიშნეს, რომ შეერთებული შტატები კვლავ აწვდის უკრაინას თავდაცვით სადაზვერვო ცნობებს - ეს არის ინფორმაცია, რომელიც ეხმარება უკრაინას თავდასხმებისგან თავდაცვაში - მაგრამ არ აწვდის კოორდინატებს რუსეთის სამიზნეებზე იერიშის მისატანად.
